STA CRUZ - Comunidad a wordo sacudi un biaha mas na momento cu a bira conosi cu prome minister Mike Eman a bai di acuerdo pa acapara 500 refugiado.
Noticia ta cu lo usa sporthal Centro Deportivo Betico Croes y e veld di little league na Dakota.
Sinembargo no por mira ningun movecion ni preparacion y pueblo di Aruba mes no a wordo informa.

Si bo ripara bon Mike Eman no ta hasiendo net net nada den ultimo temponan aki. N A D A! E ta bon scondi ora tin discusion fuerte den comunidad. Ora cuidadanonan wordo asalta, agredi, asesina, e ta keda scondi. Awor cu tin tanto polemica cu e tema di refugiado, un biaha mas e ta keda scondi. Ta kiko nos tin na un minister presidente asina cobarde?

Henter comunidad ta puntra su mes ki dia Mike Eman ta duna cara na pueblo y splica kiko el'a palabra y mas ainda, con e ta bai hasi'e.

Arubianonan ta hendenan di curason grandi, tolerante y semper ta cla pa duna un man na esnan cu mester di dje.
Sinembargo tin hopi arubiano ta sinti cu awor tin otro problemanan cu mester haya prioridad. Tin hopi pobresa den nos comunidad y criminalidad a alcansa limitenan cu nunca nos a spera.
Y den tur e dolornan aki e prome minister di pais Aruba ta sconde. E no ta mustra su cara.
Unico momento cu bo ta wak e, ta ora e ta subi pal'i lus pa duna lus of ora e ta manipula durante un conferencia cu 78% di nos comunidd ta felis. Mi ta sigur cu ni Mike Eman mes por ta felis bou e circumstancianan cu nos pais ta bibando.

Pesey mi ta urgi henter nos comunidad, ban uni y pone presion riba Mike Eman pa e sali for di su escondite. Pa e duna cara na comunidad. Pa e splica kiko ela palabra pa cu e tema di fugitivo y con e tin pensa di hasi locul el'a priminti.

Expresionnan haci den e articulo aki no necesariamente ta refleha opinion di ArenaPoliti.co