ORANJESTAD -- Parlamento a yama minister Benny Sievinger pa duna cuenta di negoshi di tereno.
E reunion a wordo posponi dos biaha caba pasobra partido AVP tin problema cu e topico aki. 

E defensa di minister tabata uno masha fofo. E no a contradesi ningun di e pruebanan cu oposicion a presenta na dje. Loke e minister a hasi ta ataca maneho di ex minister di infrastructura pa MEP. Pero hustamente tur loke minister Sievinger a trese padilanti tabata prueba con un gobierno drechi ta actua. Un gobierno di MEP cu ora tabata tin duda, tabata pidi Veiligheidsdienst pa investiga. E gobierno di AVP, ora nan tin duda, ta GOOGLE!

Primo di lider di MEP
E minister a trese un caso dilanti di un primo di lider di MEP cu a haya tereno na Noord. Lider di MEP a bise cu e unico primo di dje cu a haya tereno na Noord ta minister pa AVP Paul Croes. Si e tin problema cu Paul Croes, atende e cosnan ey den partijraad di AVP y no den Parlamento. "En todo caso, ami nunca a traha pa Paul Croes. Minister Sievinger mester stop di ganja. Mientras e ta ganja ta mas e ta fortifica e impresion cu e tin cos di sconde" Evelyn Wever-Croes a duna di conose.

Minister Mike Eman tambe tabata presente durante tur e reunionnan. E no ta bisa ningun palabra, pero e tey si pa protehe e negoshi di tereno di Benny Sievinger y parse mescos cu e tambe ta hinca aden. Pasobra den ningun discusion importante di nos pais, bo ta mira Mike Eman. Ta solamente ora e subi palo di lus pa duna lus, of pa defende e negoshi di tereno, bo ta wak e.

Acusacionnan serio oposicion a lansa contra minister Benny Sievinger. Entre otro cu ela aproba 42 mil meter cuadra pa un compania cu ni tabata existi ainda. Minister mester splica dicon e no ta check prome na ken e ta duna tereno. Entre otro cu su "chief of staff" ta scohe tereno pa sra Leoncita y ora e haya un adecua, e ta avisa Leoncita pa Leoncita hasi un peticion na DIP. Cualquier cuidadano mester hasi su peticion prome na DIP y despues ta haya tereno. Dicon den e caso aki ta haya tereno prome?
Asina tin mas acusacion grave cu minister Benny Sievinger mester contesta ainda den Parlamento.

Expresionnan haci den e articulo aki no necesariamente ta refleha opinion di ArenaPoliti.co