“Mester cuminsa sigura nos costanan, y despues pone orden paden den nos pais” 

ORANJESTAD – Parlamento siman pasa a invita Minister Dowers en relacion cu e ola di criminalidad na Aruba.
Lider di MEP Evelyn Wever-Croes a indica un biaha mas cu e problemanan di nos pais ta serio, pero e solucionnan no ta dificil.
Nos por surpasa e problemanan, pero nos mester tin un vision bon cla con pa hasi Aruba mas sigur pa tur cuidadano. Nos mester tin determinacion pa actua cu man duro contra criminalnan, y prepara e leynan necesario cu prioridad. Y finalmente nos mester tin curashi pa caba cu abuso.
“Mi ta convensi cu si nos pone un vision cla nos dilanti, nos mustra determinacion y curashi pa combati criminalidad, nos lo logra, pero no cu e gobierno aki, y sigur no cu Minister Dowers” segun lider di MEP.

SOLUCIONNAN DI MEP
Lider di MEP Evelyn Wever-Croes a presenta algun solucion cu MEP ta boga p’e, cu ta demostra e vision, determinacion y curashi. MEP ta propone un plan cu dos paso.

Paso 1:
Nos mester cuminsa cu sigura nos costanan pa stop importacion ilegal di hende, arma y droga. Pasobra tanten cu nos no segura nos costanan, nos no por pone orden paden den cas. Con nos ta haci nos costanan mas sigur?
Bin bek cu e radarnan, of manera mi colega Besaril a propone, usa drones pa vigila e costa manera e radarnan chikito tabata funciona.
Bin bek cu e helicopter, pasobra awor ora un preso hui, no tin ni helicopter pa buske. Regla e posicion di Warda Nos Costa, duna nan e autoridad y especialmente material pa nan por traha, pa asina nos por controla nos costanan miho y sigura nan.
Una bes paso 1 ta implementa, nos por cuminsa traha na paso 2.

Paso 2:
Pone orden paden den cas. Combati criminalidad cu man duro, sino criminalnan ta tuma over. Nos mester mas polis riba caya, y mester duna departamentonan di husticia material pa nan funciona. Pasobra e forma con empleadonan di KIA, KPA, Imigracion, CEA, Warda Nos Costa, Brandweer mester eherse nan trabou, ta bergonsoso, y no ta digno di un pais cu ta pretende di ta 5 strea.
Hues a bati mahos riba dede di Minister di Husticia riba e situacion deplorable na KIA. E Minister mes ta keto keto riba esaki.
Pa trese mas siguridad y trankilidad den e area turistico, mester introdusi ‘tourism police’ specialisa pa opera na un forma cu no ta intimida turista, pero manteniendo orden den area turistico.
Esakinan ta apenas algun di nos plannan pa trese bek e siguridad den nos pais. Cu e vision aki, y cu e determinacion y curashi cu MEP semper a demostra pa combati criminalidad, nos lo logra sigur” lider di MEP a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co