Semper ora pueblo kere cu e no por wordo decepciona mas pa su parlamentarionan, semper e ta wordo sorprendi pa mira con semper nan por reemplasa un decepcion cu uno mas grandi. Desde cu gobierno a bin gaña pueblo cu danki na su ‘esfuersonan’, e refineria lo wordo habri como ‘un mehorador’, un miembro di oposicion ta bende pueblo cu danki na su trabounan y bon amistad cu PDVSA, e ‘mehorador’ lo habri. Tur dos a lubida di bisa pueblo e berdad. E berdad ta, cu e interes renoba di PDVSA pa Aruba, a bin pasobra e gobierno di Corsou no tabata kier pa PDVSA sigui perhudica e salud di su hendenan y contamina su medio ambiente mas.

Siman pasa pueblo por a mira diferente miembro di oposicion, despues cu nan a ‘studia’ e ‘CITGO-deal’ bou vigilancia, cuminsa campaña, hunto cu gobierno, cu e ‘CITGO-deal’ ta algo bon pa Aruba. E motibo duna, tabata cu algun comerciante local, kisas lo por suministra algun producto na e ‘mehorador’. Wel e siman aki, e campaña pa suavisa pueblo su mente pa acepta e ‘CITGO-deal’ como e unico alternativa y cu e ta algo bon a sigui. Pueblo por a lesa: ‘AVP kier bin hunga e wega politico pa ‘lok uit’ MEP pa vota contra e re-apertura di e refineria’, ‘Cu esaki nan kier logra pa hendenan di MEP fada y cuminsa critica e deal y boga pa MEP vota contra e deal’ y ‘AVP kier bay cu e gloria y nan kier tin algo pa por bay campaña den e masa contra MEP’ (Solo, 26 september 2016. Pues solamente pasobra e miembronan di MEP tin miedo pa AVP, MEP lo vota ‘VOOR’.

Ni maske cuanto gobierno a abusa, a maltrata y a falta respet pa parlamento, oposicion lo vota ‘VOOR’ pa un otro ‘deal’ controversial cu lo redobla e debe biyonario nacional actual den algun ora, pasobra oposicion tin miedo cu ‘AVP kier bay cu e gloria’. Cu otro palabra, oposicion ta bisa pueblo di antemano cu e tambe lo ta complice pa pasa un ley anti-pueblo, net manera e la haci 8 september cu e ‘Amienda’, pasobra e tambe kier aparenta como e ‘Salbador’ di Aruba cu e apertura di un ‘mehorador’, banda di AVP. Cu gobierno a viola tur sorto di ley sin aprobacion prome di parlamento no ta conta. Asuntonan di polucion, salud di hende y esun di migracion tampoco. Parce cu ni e prijs biyonario cu pueblo lo mester paga pa e aventura aki, no ta importante. E unico cu ta interesa e politico tradicional, ta con e por keda sinta riba su stoel den gobierno of parlamento. Y si e tin cu ‘Flip-Flop’ of tira tur sorto di santo den pueblo su wowo pa logra e meta aki, ‘So be it’!

Pues locual partido ABO a anticipa desde 13 mei 2016, ora cu tur fraccion den parlamento a sali felicita gobierno cu e apertura di e ‘mehorador’, sin cu nan a mira un documento, lo bira realidad. Desde e fecha ey, nan a duna gobierno un cheque blanco pa ‘wheel and deal’ na su antoho. Kisas awor, pueblo por comprende miho pakico parlamento a keda asina keto y complaciente, mientras gobierno tabata viol’e.

E estadista mas grandi cu Aruba a yega di conoce, señor difunto Betico Croes, a uza dos declaracionnan profetico den su lucha pa logra Status Aparte: ‘Miho muri na pia cu biba na rudia’ y ‘Materialismo lo vence idealismo’. Wel parce cu e declaracionnan aki, a bay den e caha di olvido, hunto cu su vision, su idealismo, su lucha y su sacrificio. Awendia, e cabay di campaña ‘mehorador’, ta mas importante cu integridad, sinceridad, curashi y haci locual ta corecto!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co