Tin mucho mas dollar den circulacion. 

ORANJESTAD - Apertura di e refineria bou di maneho di CITGO ta trece diferente beneficio pa pais Aruba. Na prome luga e ta yuda Aruba yega na un presupuesto balansa y na mesun momento e ta consolida e reserva di dollar di nos pais. Esaki ta locual Prome Minister Mike Eman a splica prensa ora cu el a papia riba e ultimo detayenan di e ley cu ta haci posibel reapertura di Refineria di Aruba. E ley a wordo firma door di Gobernador, Conseho di Minister y diferente actanan notarial tambe a wordo firma.

Na momento cu e acuerdonan a wordo firma, Aruba por ehempel, a haya tur loke cu Valero tabata debe na impuesto, cual ta un suma di 26.2 miyon florin cu a bay directamente den caha di Gobierno y lo aparece riba presupuesto di 2017. Ademas di esaki, tin un suma di 30 miyon dollar di e “settlement agreement” cu Aruba lo ricibi (di Valero) y lo haya esaki como un forma di dividendo via di Refineria di Aruba (RDA). Tur esakinan ta yuda den presupuestonan di 2017 y 2018. Door cu no ta bay tin deficit mas, e ta yuda e GDP crece y ta mira e ora tambe cu e debe di pais Aruba, den porcentahe, ta bay ta bahando sin cu ainda no a paga riba e debe bieu aki. Na e momentonan aki Aruba ta pagando unicamente interes riba su debenan y no a yega na cuminsa baha e suma presta. Na momento cu yega na un presupuesto balansa, por cuminsa na paga interes y tambe e debe mes.

Loke ta importante tambe, Prome Minister Mike Eman a splica, ta e cantidad di placa cu ta bay drenta Aruba como divisa. Aruba ta importa casi 100% di loke ta consumi, tanto den alimento como otro productonan y esakinan ta wordo paga cu dollars cu tin na Banco Central. Aworaki Aruba ta haya gran parti di e dollarnan for di locual turistanan ta laga trece nos isla. “Na momento cu bo unico fuente di entrada di dollar ta e sector turistico, e ta un reto mas grandi pa tin suficiente dollar den comparacion di loke mester paga na importacion. Desde cu e refineria a cera, aunke cu nos a keda cu reserva di 3 pa 4 luna, e no tabata mes facil pa mantene e reserva halto. Cu e refineria den operacion, e entrada di divisas ta bay ta enormemente grandi y ey tambe ta bay mira un consolidacion di e posicion di e ‘betalingsbalans’ di Aruba (cuanto dollar ta drenta vs cuanto dollar ta sali). E balansa ey ta bay ta hopi faborabel cu e operacion di e refineria na Aruba.”

Expresionnan haci den e articulo aki no necesariamente ta refleha opinion di ArenaPoliti.co