Mientras cu e trabounan na Barcadera, na unda e waf di container ta bin, ta den full swing, otro trabou ta start na porta di waf na Playa na unda e cruceronan ta mara. For di inicio di gobernacion na 2009, Gabinete Mike Eman a enfoca grandemente pa renoba centro di ciudad cu tabata den un situacion deplorabel. E vision aki a forma parti di e joya di e programa ‘BoAruba’ na unda na mes momento varios proyecto tabata tuma luga pareu. E resultado ta bisto. Aruba tin un Caya Grandi di kita sombre, na unda tiendanan di renombre mundial ta situa. Awor ta sigui pa e siguiente fase cu ta construccion di un Welcome Plaza na waf. Containernan di Playa ta muda bay pa Barcadera y e sitio lo wordo converti den un parke di diversion, un luga pa landa y pa eherce deportenan acuatico. Un bunita luga pa ricibi e turista crucero.

BoAruba ta nifica comunitarismo den tur aspecto. E programa BoAruba ta encera diferente proyecto cu tin su enfoke tanto riba tereno di infrastructura como social, educativo y deportivo. E proyectonan BoBario, Renobacion di Bario, Pinta Bo Bario y Deporte den Bario cu ta resorta bou di e programa total BoAruba tin un meta comun: mehora calidad di bida di tanto e comunidad Arubano como e producto Aruba. E actividadnan extenso ta implica inversionnan grandi pa drecha e aspecto fisico di Aruba. Asina a construi camindanan nobo, a revitalisa centro di Playa y San Nicolas den tur sentido, ta drechando scolnan y e barionan a haya e atencion necesario.

Mayoria di e edificionan den y rond di Caya Grandi a wordo restaura. Edificio di Corte a keda cla y a keda un obra maestral. Ta trahando duro riba Plaza Padu, cu ta situa panort di Bestuurskantoor y e edificio Cocolishi ta otro proyecto cu a keda cla. Watertoren tanto na Playa como San Nicolas a wordo reconstrui. E edificio mas bieu di Aruba Willem III Toren a wordo renoba mescos tambe Fort Zoutman. E cas di Gobernador a haya un restauracion completo. Cu participacion di e habitantenan y gruponan di interes, Gabinete Mike Eman lo mehora un gran cantidad di bario na Aruba. Parti di esaki ya ta den ehecucion caba. Barionan cu mester di atencion urgente a haya luznan di caya, asfalt y unda mester a pone polis di bario bek pa di e forma aki tin miho control. Cu e programa BoAruba Gabinete Mike Eman ta realisando comunitarismo den tur aspecto. Comunitarismo ta pone accento riba e necesidad pa balansa e derechonan y interesnan individual na esnan di henter e comunidad y ta argumenta cu individualnan ta wordo forma dor e cultura y balornan di nan comunidad. Practicando comunitarismo na Aruba Gabinete Mike Eman I y II ta trece bek norma y balornan cu ta haci un comunidad loke e mester ta. Un comunidad caminda habitantenan mes ta percura pa nan bario y pa otro. Ta duna un man unda mester y ta contribui na su bario ora esaki ta wordo pidi di dje.

Resultado di e trabounan haci ta tremendo. Centro di Ciudad ta exito tremendo, specialmente si tuma na cuenta e cantidad di local y turistanan cu ta bishita e centro tur dia. Inversion ta bek den curazon di ciudad. Awor otro fase ta cuminsa cu construccion di e Welcome Plaza y na mes momento ta kita e warehousenan deca’i cu tin riba tereno unda antes Free Zone tabata situa cu ta duna un bista mahos, specialmente riba e ruta cu mayoria di turista ta tuma pa yega nan hotel. Cu e inversion aki ta crea trabou pa mas hende loke ta bon pa economia di Aruba.

Expresionnan haci den e articulo aki no necesariamente ta refleha opinion di ArenaPoliti.co