Empleadonan ta e curason di tur organisacion. 

ORANJESTAD -- Parlamento a trata e presupuesto di parlamento pa 2017. Lider di MEP Evelyn Wever-Croes den su discurso a papia di e capital humano, e personal di parlamento cu ta dedica alma y cuerpo na e trabou. Algun pa masha hopi anja di nan bida. Lider di MEP a pidi presidente di parlamento atencion pa e maneho di personal. Mester traha riba functie beschrijvingen pa e funcionnan y no mag ripiti cu un miembro di personal cu a cumpli 25 anja di servicio, su jubileum a wordo lubida.

Lamentable tabata cu mientras cu di parti di MEP tabata pidi atencion positivo pa e personal, di parti di AVP a ataca y ofende e personal. Na un forma baho Desiree Croes a acusa personal di parlamento di a atak'e riba facebook y di saca informacion confidencial. Esaki ta un acusacion hopi grave. Pero sra Desiree Croes no kier a duna mas concreto ta ken ni kiko exactamente a wordo bisa. Cu esey e ta pone un mancha inhusto riba henter e personal di Parlamento.
Lider di MEP Evelyn Wever-Croes a exigi mas respet pa e personal y pa sra Desiree Croes bisa exactamente kiko e acusacion ta y si e no hasi'e e mester pidi disculpa na e personal di parlamento.
Lamentablemente e no a hasi esaki pero mas lamentable ta cu e presidente di parlamento sra Mervin Wyatt-Ras no a sali na defensa di e personal di parlamento.

"Un sucedido lamentable, pero cu no por keda asina. Desiree Croes ta kere cu ora e tin e microfono e por ofende ken cu e kier sin base y sin prueba. Hopi biaha hasta e ta ganja. E no por sigi hasi esey y mancha integridad di tur trahador di parlamento. Pesey mesora mi a exigi un reunion interno di e lidernan di fraccion pa atende cu e tema aki. Ora bo hasi un acusacion bo mester para den bo sa partido cu curashi y bin cu prueba. Djis susha nomber di hende ta shisheria" asina lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co