Den linea cu vision di Gabinete Mike Eman. 

ORANJESTAD – Canando den bario, ciudadanonan ta duna di conoce e deseonan cu tin pa mehoracion di nan bario. Scucha e deseonan aki y haci nan realidad ta loke gobierno hunto cu FCCA a haci. FCCA, hunto cu Minister encarga cu desaroyo teritorial y infrastructura, a firma contractnan pa construccion di casnan social, casnan specialmente pa nos grandinan y tambe casnan cu bista riba futuro sostenibel. Hunto cu e proyectonan aki, gobierno y FCCA, ta enfoca tambe den eleva calidad di bida di habitantenan di e barionan.

Na Bushiri a cuminsa cu un concepto, caminda cu den barionan ta construi un cancha deportivo, den e caso aki di mini futbol cu yerba artificial, caminda cu recreacion y biba saludabel den barionan ta haya e debido atencion. Na Madiki a amplia e concepto un poco mas, caminda cu banda di e cancha di minifutbol, a desaroya tambe un area pa haci ehercicio den aire liber, un aspecto cu ta wordo hopi uza den e bario. E siguiente proyecto di recreacion y movecion ta na Cura Cabay Zuid.

“Ademas di e Casnan pa Senioren, nos ta drecha nos barionan tambe. Un di e proyectonan cu nos a scoge pa mehoracion di nos barionan ta construccion di un cancha di ‘street soccer’ na Cura Cabay Zuid,” Jose Paula, hoofd Sector Bouwtechniek a splica durante e ceremonia di firmamento di contract cu companianan di construccion. Paula a bisa cu nan tin masha bon experiencia cu e prome cancha cu nan a construi na Bushiri y e di dos na Madiki Kavel cu a keda inaugura algun luna pasa.

A scoge Cura Cabay Zuid pasobra e ta un bario basta grandi. FCCA tin 121 cas den e area aki, locual ta encera cu tin casi 400 persona bibando den e bario. Pues e bario aki sigur mester di un facilidad recreativo y no solamente pa e hobennan. E facilidad deportivo ta encera un cancha pa street soccer, rond di e cancha ta construi tambe un “loopbaan” pa adultonan por cana rond. Tambe e ta encera dos otro facilidad, uno di fitness y un ‘playground’. Di e forma aki ta duna atencion na tres grupo. “Mientras cu e muchanan ta hunga futbol, mayornan ta haci uzo di e ‘loopbaan’ y esnan mas hoben ta den e area di ‘fitness’,”Paula a señala.

Gabinete Mike Eman ta concentra pa trece un mehoracion di calidad di bida den cada bario. E infrastructura ta un herment pa yega na e miho calidad di bida, door di incentiva recreacion di hobennan, pero tambe movecion saludabel pa un y tur.

Expresionnan haci den e articulo aki no necesariamente ta refleha opinion di ArenaPoliti.co