Prosperidad Comparti. 

ORANJESTAD - Para banda di Ministernan di su Gabinte, Prome Minister Mike Eman a anuncia decisionnan valioso pa pueblo di Aruba cu a wordo tuma den Conseho di Minister diamars ultimo. E decisionnan cu a wordo tuma ta esnan final rond di presupuesto 2017. Diaranson Minister di Finanzas lo presenta e ultimo notanan di cambio. "Cambionan cu ta refleho di e maneho cu nos gobierno a stipula pa aña 2017 y e añanan nos dilanti."

Eman: "Siguiendo e liña cu ta asina fundamental pa nos Gabinete desde cu comunidad a duna nos e mandato pa dirigi e pais aki nos por tuma e decisionnan positivo aki." Eman a bisa cu gobierno a  pone hopi enfasis riba inversion pa stimula e economia, pero tambe riba inversion pa mehora y fortifica e poder di compra di e comunidad. "Un di e decisionnan cu a wordo tuma awe den consulta hopi estrecho cu SVb ta pa aumenta pensioen di nos grandinan (AOV) cu 2,3% pa otro aña. Esaki ta posibel danki na recuperacion di e fondo a base di e diferente reforma y  remodelacionnan cu nos a haci."

Eman a splica cu gobierno ta bay propone na SER pa hisa salario minimo cu 2% pa otro aña. "Despues di e conseho di SER e proposicion aki ta bay Parlamento. "Nos ta purba pa e aumento aki  logra na sea januari 2017 of februari 2017." Un otro cambio positivo ta cu e uitkering normativo ( esun cu ta wordo usa como norma) di un persona cu ta riba bijstand ta Afl.407,00. E suma aki ta wordo hisa na 450 florin. Pa cada miembro di famia cu tin subsidio  cu awor ta Af. 175,00 y esaki ta wordo aumenta na Afl. 200,00. E schoolkinderentoeslag pa cada mucha den un famia di menos recurso ta haya un aumento di Afl.50,00. Asina ta cu el a bira awor Afl,. 250,00. "Un otro cambio positivo ta cu e suma cu cada famia ta haya un bes pa aña como un aporte pa cada yiu cu ta bay scol cu awor ta Afl. 120,00 ta bira Afl. 220,00 y esaki hunto cu e aumento di bijstand ta bay yuda grandemente esnan cu mester di e asistencia social aki." Despues di a anuncia tur e progreso comparti aki Eman a bisa di ta spera cu otro aña e aumentonan ta mas grandi mirando reapertura di e refineria.

Pa loke ta studiantenan cu ta lucha cu e peso di pago di nan studielening, gobierno ya caba a introduci den pasado un suavisacion di e peso aki pa e studiante cu despues di caba su estudio regresa Aruba dentro di tres aña lo haya un reduccion di 30% di su debe. Esaki a keda introduci na 2012 y tambe a posibilidad pa esnan cu kier paga nan debe den un solo bes ta haya e rebaho di 30%. "Awe den Conseho di Minister a dicidi pa subi e rebaho di 30% na 35% cu ta encera un suma considerabel. Banda di esaki Minister di Finanazas a anuncia esaki caba, pero awe el a wordo ratifica ta cu ora di paga studielening bo por reduci e suma henter - te un maximo di 10 mil florin -  cu bo ta paga di bo belasting y no solamente e interes so manera antes tabata e caso."

Eman a sigui conta cu un peticion cu gobierno a haya di sindicatonan y specificamente di FTA ta pa socialisa e pago cu ta wordo haci pa pikimento di sushi. E suma mensual di 25 florin ta bira 10 florin pa famianan cu tin un entrada di bou 2500 pa luna.

Finalmente Minister Eman a anuncia un di e decisionnan cu ta conta pa tur hende y cu a keda dicidi den Conseho di Minister ta e hecho cu ta logra reduccion di e tarifanan di coriente den un forma substancial. "Pa inicio di otro aña prijs di energia pa casnan residencial ta bay baha cu 15% y e prijs comercial ta bay baha cu 5%. Un peso grandi ta kita aki. "E hecho cu bo ta logra un reduccion di 15% di e gasto total di famianan na Aruba ta algo sumamente grandi."

Eman a bisa di ta contento cu tur e decisionnan aki y ta bay Parlamento mañan y otro mañan cu un sentido grandi di orguyo di por ofrece tur esaki na comunidad di Aruba.

Expresionnan haci den e articulo aki no necesariamente ta refleha opinion di ArenaPoliti.co