Pueblo di Aruba, diripiente sr. Eman ta sali padilanti, den e spirito di e festividad di Sinterklaas, ofreciendo masha hopi regalo na e pueblo di Aruba. E regalonan ta e.o. cu gobierno ta bay duna un aumento di bijstand, tambe schoolkindertoeslag di Afl. 100 y despues pa Afl. 200 pa cada mucha di un mama cu ta cobra bijstand. Tambe  familielid bijslag pa un famia cu ta biba di bijstand. Tambe pa un mama soltera cu ta cobra bijstand. Tambe Aumento di Pensioen pa nos grandinan,  etc. etc. Ta masha bunita pa ofrece un pueblo tur esaki y mustra cu abo si ta ofrece prosperidad. Pero, como un hende realistico, bo mester por husga e hazaña aki pa compronde e berdad tras di dje. Dicon Mike Eman semper ta lubida esnan cu ta labora y cu ta percura pa placa drenta caha di gobierno? Eman ta hunga Sinterklaas cu placa di e pagado di belasting, surpasando su presupuesto di aña tambe, convertiendo esaki den un debe, cual debe e propio pagado di belasting tin cu bay paga tambe, anto na un interes haltisimo. Sinterklaas Eman a bisa tambe cu e ta orguyoso di a crea e debe nacional di cual e pueblo cu ta lubida lihe, tin cu bay paga tambe anto sin protesta. Contrario Riot comando y cacho lo wordo manda riba nan! Con Eman por hunga Sinterklaas cu placa cu e no tin? Kisas paso su persona no ta compronde nada di economia? Prueba ta cu tur e companianan cu sr. Eman tabata envolvi, TUR a bay failliet. Interbank tambe a keda sin haya su 2 miyon cu nan a fia Eman na cero porciento y sin garantia alguno. Sinterklaas Eman ta duna shelo y tera na Citgo siendo cu e ta LUBIDA riba esnan cu si a keda carga e economia di pais Aruba. Ki dia ta bin un alivio den belasting pa comercio? Aruba siendo e país cu e porcentahe di belasting mas halto na mundo! Dicon Sinterklaas Eman no ta bisa e pueblo laboral cu el a hisa e edad di pensioen mand’e 65 aña? Dicon Sinterklaas Eman no ta propaganda cu el a subi e prima y e maximo di AOV di manera cu NUNCA mas abo por haya placa bek? Tambe cu e pueblo mester a paga mucho mas caro pa awa y coriente cu normal door di e hedging pa culpa di bobedad y incapacidad di De Meza? Dicon Sinterklaas Eman no a kita HUUR di edificionan manera el a priminti den campaña 2009 y 2013? Eman a bisa di ta orguyoso di tin tanto coordinador rond di su persona manera “groene pieten”. Cuanto placa Sinterklaas Eman ta kita for di e pagadornan di belasting pa paga su coordinadornan? Dicon Sinterklaas Eman no ta bisa cu door di su mal maneho financiero, su gobierno ta manera cacho mara na cadena door di su doño, kende ta Hulanda pa medio di CFT y CAFT? Anto un cacho cu e mes a bay di acuerdo pa wordo mara desde 27 augustus 2015. Sinberguensa ta keda santo y limpi compara cu Sinterklaas Eman. Esnan cu sr. Danies ta culpa di ta abusador ta keda chikito compara cu e gran abusador di e pueblo di Aruba. Pueblo di Aruba mester por compronde cu tin nada pa gaba cu ne, sino ta trata di solamente un campaña politico ficticio, insultando e sabiduria di e pueblo y di prostitucion gubernamental. Ainda abo ta kere den Sinterklaas Eman?

Expresionnan haci den e articulo aki no necesariamente ta refleha opinion di ArenaPoliti.co