EVELYN WEVER-CROES A RETA MIKE EMAN. 

ORANJESTAD - Lider di MEP Evelyn Wever-Croes a reta Mike Eman den Parlamento diahuebs ultimo. 

"Den e debate den Parlamento diahuebs ultimo lider di AVP Mike Eman tabata masha negativo y frustra. Ela demostra di ta un lider hopi frustra y un lider hopi debil, sin credibilidad.
En bes di defende su maneho y su vision, Mike Eman a scohe pa ataca un maestra inocente y humilde, lastre den lodo, atacha su credibilidad, djis pasobra el’a kere cu asina e por atacha mi credibilidad.
Pesey mes mi a bis’e cu e mester tin berguensa cu e ta bin den e sala di e instituto mas halto di nos pais, pa bin lastra hende drechi, esey ta mustra cu Mike Eman ta un hende debil.

Mike Eman kier hunga cu mi credibilidad, pero mi ta kere cu e mester ta mas preocupa cu esun di dje. No ta ami no a priminti pa elimina BBO y keda sin cumpli. No ta ami no a presta placa na Interbank y keda sin paga bek. No ta ami ta complice na e robo di fondo desaroyo San Nicolas.
Ami ta un hende cu ta bisa loke mi ta bai hasi, y mi ta hasi loke mi a bisa.
Ademas, ta ami ta den politica, pues debati cumi. No bin den Parlamento pa lastra hende drechi.

Pesey mi a reta Mike Eman pa debati cu ami, anytime, anyplace. Ban debati riba kiko abo tin di ofrese Aruba y kiko ami tin di ofrese Aruba.

Aruba mester di un lider cu por inspira su pueblo, no un lider frustra. Aruba mester un lider positive cu ta duna speransa, no un lider negativo y rencoroso. Aruba mester un lider cu tin vision y ta wak padilanti, no un lider cu ta keda pega den pasado. Mi ta spera cu Mike Eman acepta e reto y lagami sa ki dia nos por debati riba e solucionnan cu e por brinda Aruba, y e solucionnan cu ami por brinda Aruba” lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co