Parlamentario, sr. Guillfred Besaril, recientemente a tuma nota di e expresionnan di Minister Schwengle den cual e ta label e bario di Savaneta como un bario bruha y pober. Riba e expresionnan di e Minister, sr. Besaril a declara lo siguiente.

"Na prome instante mi tabata convenci cu ta trata aki di un eror. Mi no por a imagina mi c'un persona cu a lanta den Savaneta por expresa su mes di e forma aki di su bario; di mi bario!
Mi unico conclusion despues di a mira e grabacion di e reunion publico y a lesa e declaracion di Minister Schwengle ta, cu e debe henter Savaneta un disculpa!
Sr. Schwengle den su declaracion a purba defende su mes den un forma bastante arogante, como si fuera henter Aruba a tende robes locual cu el a bisa.

Kisas den bista di e Minister Savaneta ta un bario pober y bruha, pero den mi bista Savaneta ta un bario rico na tradicion, trankilidad y respet. Un bario cu mi ta sumamente orguyoso di dje. E bario caminda henter mi famia tabata tin e previligio di a lanta den dje. Caminda mi mayornan nan lombrishi ta dera.
E bario caminda mi ta biba aden. E bario den cual mi ta lantando mi yiu y cu hopi orguyo!
E bario cu lo mi keda fiel na dje te dia mi cera mi wowonan.
Savaneta ta un bario rico na hendenan trahado y balente, cu logronan grandi pa e bario; di diferente profesionalnan te na un Gobernador.
Un Gobernador cu tambe a biba lanta algun meter leu di e conocido establecimento "Hotel Roys!"

Cu den Savaneta tabatin un establecimento cu a yama "Hotel Royce" y cu esaki a sa di trese cierto inconveniencia den un caya specifico di Savaneta, no ta hustifica pa yama henter e bario di Savaneta como “un bario bruha y pober”.
Hotel Royce tabata un establecimento cu esnan cu tabata bishite kisas (mi no sa) lo ta bruha, pero Savaneta sigur cu no!

Mi a menciona nos Gobernador actual, sr. Fredis Refujnol. Ademas di sr. Refujnol, ta hopi ta esnan cu a lanta den e vecindario specifico aki di Savaneta. Awendia nan ta agente policial, docente, “accountant”, ingeniero hasta politico.
Pero na ningun momento so, NI UN DI NAN a expresa nan mes den e forma arogante y sobre todo denigrante asina di nan bario di Savaneta. Pa e simpel motibo cu un establecimento no ta defini henter un bario.

Ami ta sumamente orguyoso di a nace na Aruba y mas ainda di ta biba den e dushi  bario di Savaneta!
Awor na Minister Schwengle pa cumpli cu e bario cu a mire lanta y yega ta na unda cu e ta awe. Sea humilde y haci lo corecto pa e dignidad di esnan cu ta biba y stima e bario! Bin dilanti y pidi e disculpa necesario, Savaneta completo a scucha bo palabranan Minister!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co