Gabinete Eman ta sigui desgracia e pais aki!   

Constantemente nos por constata con Rene Herde y otro politiconan di AVP cu hopi orguyo falso ta gaba cu gobierno di AVP a logra baha e deficit financiero di pais Aruba te cu 2% di nos GDP, pero nan no ta splica pueblo cu ta hustamente e gobierno aki mes a logra crea deficitnan astronomico acumula di 1.9 biyon florin den apenas 6 aña di tempo, cual ta un promedio di 316 miyon florin pa aña y cu un record di 443.3 miyon na 2012.  Esaki ta e desaster di mas grandi hamas bisto den historia desde entrada di Status Aparte na 1986. Nos por mira tambe asina tanto gabamento di un supuesto reduccion di e deficit financiero na 2016 y 2017, pero debi cu e desaster financiero ocaciona pa AVP ta asina grandi y espantoso, nos debe nacional lo no baha den e proximo añanan. Segun CAFT, nos debe nacional lo sigui aumenta y ta premira cu na aña 2018 esaki lo yega te na mas cu 4.3 biyon florin. Mira e grafico adhunto.

Debe extra di 90 miyon florin
Alavez tur dia e exponentenan di AVP ta gaba riba tur nan proyectonan PPP (Pa Pueblo Paga), esta e construccion di e Hospital, Green Corridor, Watty Vos Blvd y e MFA-nan, pero nunca nan ta splica pueblo cu na momento cu tur e proyectonan aki termina, cu te ora ey numa gobierno (lesa: pueblo) ta haya e cuenta presenta y cu cu nan tin di cuminsa paga e debe aki. Segun un tabel cu Banco Central mes a presenta, e Hospital ta rekeri un pago di 24 miyon florin durante 29 aña largo, e Green Corridor ta rekeri un pago di 29.3 miyon durante 25 aña, e Watty Vos Blvd un pago di 32.6 miyon durante 25 aña y e 4 MFA-nan un pago di 1.8 miyon durante 25 aña. Pues den total ta papia aki di un debe extra di casi 90 miyon cu tur aña y durante 25 pa 29 aña e pueblo mester sangra pa motibo di un gobierno di lunaticonan cu ta biba den tur nan grandeza riba custia di pueblo.  

Strop financiero
Principalmente te ainda Gabinete Eman no kier splica pueblo di unda lo saca e suma astronomico  di 90 miyon florin extra tur aña (Financial Transfer Tax?) y tur esaki teniendo cuenta cu ya nos ta pagando tur aña un suma di 215 miyon florin na interes di nos debe nacional y di cual Gabinete Eman tambe ta e gran malhechor. Pues cu gran probabilidad na aña 2018 tur e proyectonan menciona di PPP lo ta termina y pa e tempo ey e strop financiero lo sigui choca nos pueblo mas y mas.
Hecho ta cu partido AVP ta campeon den show, fantasia y conta storia bunita, pero e realidad cu nos pais lo bay confronta proximamente ta devastador pa e generacion aki y e futuro generacionnan. Y manera semper e gobiernonan di AVP ta keda hiba e maneho di “Après nous le déluge”, esta cu despues di nos, e pueblo por wel di zink numa, basta cu nos famianan previlegia di AVP keda financieramente bon para.

Expresionnan haci den e articulo aki no necesariamente ta refleha opinion di ArenaPoliti.co