ORANJESTAD – Minister di Infrastructura Benny Sevinger a duna di conoce cu Departamento di Obranan Publico (DOW) ta trahando arduamente pa mantene e camindanan riba nos isla den e miho condicion posibel. E ploegnan ta trahando overtime tur dia cu e makinaria y material existente y segun tempo di awa ta permiti. Banda di esey ta haciendo analisis continuamente pa determina cua e ta camindanan cu lo mester di un reparacion completo, cual trabounan ta wordo prepara pa inicia na januari proximo.

Minister Sevinger a duna di conoce cu su Ministerio tin atencion pa e dificultad cu automobilistanan ta haya riba caminda y ta ofreciendo solucion y reparacion constantemente. Ta di compronde cu DOW tin un cantidad di trahadornan y cu nan no por ta tur caminda pareu tur dia. E siman aki mes por a mira e ploegnan trahando riba caminda principal di Santa Cruz tapando buraconan, mescos cu den camindanan di santo den bario di Paraguana na Tanki Leendert.

“No por haci nada otro paso awa ta bay sigui yobe,” Minister Sevinger a splica. “Aworaki nos ta simpelmente den un periodo di yena buraconan y purba di mantene aki aya pa preveni mas buraco. Na comienso di aña nos lo sigui cu e analisis cual nos ta haciendo caba na e momentonan aki pa wak cua caminda mester drecha completamente y cua no.”

Manera ta conoci, e titular di Infrastructura a bay Parlamento pa busca fondonan adicional pa realisa e trabounan necesario. Actualmente DOW ta haciendo e tramitenan necesario pa destaho publico riba area, entre otro pa compra di asfalt cu cual otro aña por bay drecha diferente caminda. “Ora aña habri nos ta wak cua nos ta drecha completamente y cua por haci otro tipo di reparacion pa nos garantisa cu nos careteranan ta den bon condicion,” asina Minister Sevinger a finalisa bisando. 

Expresionnan haci den e articulo aki no necesariamente ta refleha opinion di ArenaPoliti.co