Prome Minister Eman den discurso nacional    

ORANJESTAD – Den e discurso nacional di Prome Minister Mike Eman na fin di aña a repasa tur loke su gobernacion a logra pa e pueblo di Aruba, unda cu e enfasis ta un miho calidad di bida pa tur ciudadano, y cual maneho mester yega den tur skina di Aruba.

E mehoracion di calidad di bida Prome Minister Eman a menciona no a keda solamente den e prome Gobierno cu el a lidera, ya cu cuminsando for di prome di januari 2017, tin mas cambio na caminda manera aumento di bijstand un biaha mas, aumento di pensioen y salario minimo, reduccion substancial di 15% den tarifa di energia. “Esaki ta un cambio grandi den pensamento unda cu ta acopla crecemento economico na desaroyo social den nos barionan pa un miho calidad di bida den nos hogarnan. Por mira esaki for di Noord te San Nicolas, di Santa Cruz pa Madiki, Dakota, Bushiri, den tur parti di Aruba nos ta mirando esaki. E ta bisto den un MFA, canchanan deportivo, trottoirnan di klinkers of den cambionan caminda esnan di menos recurso pa prome biaha ta haya un apoyo manera mester ta for di un pais. Un pais cu no unicamente mester ta preocupa pa ta orguyoso di su crecemento economico, pero tambe ta orguyoso di con e ta comparti e prosperidad cu su ciudadanonan. Esaki ta e compromiso cu nos a brasa na 2009. Mirando bek, nos por bisa cu nos ta riba e rumbo di progreso, di comparti progreso cu tur nos ciudadanonan, “ Prome Minister Eman a expresa.

E vision grandi di cambio cu Aruba a brasa na 2009 pa cambia rumbo di pais, a pone cu e prosperidad cu a bay perdi, a regresa. Pero e ta un prosperidad cu a traha duro riba dje pa yega den cada bario di Aruba, na Juwana Morto, Yara, Pos Chiquito y otronan, unda tur habitante ta biba den un realidad nobo, unda cu tin infrastructura nobo, combina cu bon desaroyo di espacionan publico. E accento tabata pa mehora e barionan y e trabou aki no a finalisa, ya cu ta hibando e maneho nobo den tur otro area di Aruba, combina den e proyecto di Green Corridor. “Esaki ta un compromiso cu nos a haci pasobra hunto nos mester crece como pais.  Nos no por wak unicamente riba crecemento economico, cu nos ta orguyoso di dje, pero nos ta orguyoso tambe ora cu nos por bisa cu desempleo  baha di casi 15 porciento te na solamente un poco mas di 4%. Cada bario cu nos no a yega ainda na dje, por sa cu e compromiso di renobacion, cambio di infrastructura, di espacio publico y embeyecemento ta e compromiso di e Gobierno aki,” e prome mandatario a splica.

Expresionnan haci den e articulo aki no necesariamente ta refleha opinion di ArenaPoliti.co