Awe 9 di februari partido Movimiento Electoral di Pueblo (MEP) ta cumpli su di 46 aña di existencia. Durante e trayectoria aki, MEP semper a sali na vanguardia y defensa di pueblo y ta pesey mes e partido aki a trece logronan historico pa pais Aruba. Alavez durante henter e 46 añanan aki MEP tabata tin e honor di tabata den gobierno durante mas cu 25 aña.
Riba dia 9 di februari 1971 nos lider inmortal Gilberto François (Betico) Croes a funda e prestigioso partido Movimiento Electoral di Pueblo, un partido cu tin como ideologia social democrata y cu a lanta pa lucha pa mas autonomia pa e isla aki. Den apenas dos luna di tempo e partido aki a logra obtene un tercera parti di e electorado Arubano, esta 7 asiento for di 21, cual ta algo cu nunca a yega di sosode den historia di Aruba. For di e tempo ey MEP a crece tanto den voto como den asiento y nunca a yega di baha bao di 7 asiento.

Sanger, sodor y lagrima 
Sin duda algun cu MEP a bira tambe e vehiculo principal di nos Libertador Betico Croes den su lucha pa nos Status Aparte. E lucha aki no tabata facil y ta solamente a base di sanger, sodor y lagrima y e union bao di e pueblo Arubano e Status Aparte a wordo realisa dia 1 di januari 1986. Durante di e 46 añanan di existencia di MEP, e partido aki a participa na 17 eleccion, tanto pa Eilandsraad, Staten di Antiyas y Parlamento di Aruba y den 9 di e 17 eleccionnan aki MEP a haya e mayoria absoluto.
MEP ta un partido cu desde su fundacion apenas a conoce tres lider, esta sr. Betico Croes (1971-1985), nos lider honorario sr. Nelson Oduber (1986-2011) y nos lider actual sra. Evelyn Wever-Croes (2011…). Un partido di cual despues di morto di su lider Betico Croes a wordo bisa na Hulanda cu “Betico dood, MEP dood”. Sinembargo bao liderazgo di sr. Nelson Oduber partido MEP a sigui crece y a logra establece recordnan electoral impresionante den Reino Hulandes. Esey ta demostra e stabilidad, prestigio y respaldo cu e partido aki tin den pueblo.

Trayectoria impresionante 
MEP ta e partido cu a percura pa nos simbolonan di union y libertad, esta nos himno y bandera, moneda, ortografia, constitucion, Gobierno, Parlamento, Gobernador, Banco Central etc. Den henter e lucha pa Status Aparte a resalta e accionnan di augustus 1977, ya cu tabata danki na e accionnan aki cu Aruba a wordo scucha door di Hulanda. Finalmente e deseo di Aruba a wordo concretisa durante e Conferencia di Mesa Rondo na 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986. Locual ta resalta den e trayectoria di MEP ta e sinceridad cu e partido aki ta desplega den e comunidad Arubano. MEP ta e unico partido cu ta bisa e pueblo adelanta con e situacion financiero y economico ta y si tin cu tuma pasonan necesario, MEP den forma sincero ta haci’e pa bienestar y futuro di nos criaturanan, sin importa cu esaki lo por costa partido voto den eleccion.

Awe lider di MEP sra. Evelyn Wever-Croes kier a gradici tur esnan cu a funda partido MEP y cu a yega di forma parti di e lista aki, na nos lider inmortal Betico Croes, nos lider honorario Nelson Oduber, tur e candidatonan, directivanan, Forza Femenina Grace, HOT, militantenan y tur e votadornan pa cu e 46 aña di existencia di nos partido.
MEP ta conta cu un nucleo solido cu lo keda sostene e partido aki y esaki lo wordo demostra un biaha mas na september proximo den eleccion pa Parlamento. 

Expresionnan haci den e articulo aki no necesariamente ta refleha opinion di ArenaPoliti.co