Rudy Richardson (MEP): Nos ta un pueblo chikito pero cu un amor grandi pa e teritorio aki
![RudyRichardson16](/cache/klixowatermark/dc0f4f68bacaef3c4a8c31dfe96e742d.jpg)
Pabien na nos digno pueblo den e siman di nos gran celebracion nacional, esta Dia di Himno y Bandera. Hisa bo bandera na cas, buta bo banderin di Aruba na bo auto y bisti bo pechi, bo t-shirt patriotico riba 18 di Maart 2017. Nos Libertador efm Gilberto Francois "Betico" Croes a lucha duro pa nos simbolonan nacional.
Nos ta un pueblo chikito pero cu un amor grandi pa e teritorio aki. Ultimo añanan na un manera hopi iresponsabel a haci politica cu nos simbolonan y historia politico di e lucha pa Aruba bira un pais Autonomo den Reino Hulandes. No por haci wega cu simbolonan di nos patria. Un bes Movimiento Electoral di Pueblo ta den gobierno, nos lo percura cu niun partido politico por troce y haci politica barata mas cu nos simbolonan di libertad.
Mi ta pidi tur conciudadano irespecto si bo a nace na Aruba, irespecto si bo ta carga un otro Nacionalidad, si bo ta biba na Aruba, bo ta respeta nos leynan y bo ta contribui na nos economía, bo ta un Arubano. Sin distincion entre nos, ban di un espirito di gratitud pa tur locual Aruba ta significa pa nos y nos yiunan y esnan cu a bay laga nos. Ban conserva y aprecia nos Aruba Dushi Tera. Pabien na nos digno pueblo den su totalidad riba e fecha tan especial pa tur di nos.
Expresionnan haci den e articulo aki no necesariamente ta refleha opinion di ArenaPoliti.co