Dangui Oduber (MEP): Minister Paul Croes MESTER entrega su retiro!
Manera fraccion di MEP a anuncia ayera, nos fraccion lo pidi un reunion di parlamento di caracter di urgencia pa presenta un mocion di desconfianza contra minister di labor, asuntonan social y hubentud Paul Croes. Awe durante dia nos a tuma nota di un declaracion duna pa Paul Croes na radio caminda e la trece dilanti cu e no ta retira sino e ta pone su funcion un banda mientras e investigacion ta andando. Esaki ta algo inacceptabel pa fraccion di MEP mirando e gravedad di e acusacionan cu tin contra Sr Paul Croes na e momentonan aki.
Paul Croes ta minister di hubentud y na momento cu tin acusacionan asina serio contra un minister asina simplemente e minister NO por keda. Como minister di hubentud e mester a duna ehempel na nos hobenan y envez di haci esaki e la manda e senjal robez pa communidad y nos hobenan y duna e ehempel di con un minister NO mester funciona.
Ministerio publico a bisa diamars ultimo cu Paul Croes ta e sospechoso principal den e caso cu e ta wordo investiga na e momentonan aki. Loke e ta wordo acusa di dje ta hopi pero hopi serio. Paul Croes ta wordo acusa di ta envolvi den labamento di placa, e ta wordo acusa di ambtsmisbruik, e ta wordo acusa di actiieve y passieve omkoping. Cu acusacionan asina serio un minister hamas y nunca por pensa di just pone su funcion un banda pa un tempo. E mester a tene honor na su mes y entrega su retiro.
Nos no a spera nada otro di Mike Eman y AVP pasobra nan ta complice di tur loke ta pasando riba e pais aki. Envez cu nan duna ehempel y condena loke ta pasando nan kier hunga martir. Loke nos no ta compronde ta e hecho cu ex parlamentaria Lainda Westerhof si a wordo oblige di entrega su retiro y Paul Croes no. Dikon Mike Eman ta midi cu 2 midi?
Nos tambe ta lamenta loke ta pasando cu Paul Croes pero e tambe mester por a pensa riba tur esnan cu a wordo estafa cu permiso. Hendenan humilde cu ta gana sueldo minimo a wordo estafa y cobra miles di florin pa haya permiso. E tambe mester por a pensa riba e danjo cu e ta haci na pais Aruba, na e imagen cu e ta danja di politiconan drechi y integro. E tambe mester por a pensa riba e consequencianan di su accionan y decisionan.
Den politica integridad ta loke ta conta mas y na momento cu un persona ta dobla pa tentacionan manera cu a pasa cu e minister aki, bo no ta integro mas.
Fraccion di MEP a duna Paul Croes e espacio pa e por entrega su retiro y e no a haci esaki. MEP lo un reunion publico pa presenta un mocion di desconfianza contra minister Paul Croes y wak cua parlamentario ta para pa bon gobernacion, cua parlamentario ta para pa integridad y cua parlamentario ta para pa bagamunderia!
Expresionnan haci den e articulo aki no necesariamente ta refleha opinion di ArenaPoliti.co