Desde 2009 Aruba conoce dos termino di Gabinete Eman 1 y 2, liderisa pa sr. Mike Eman. Nos Prome minister a promove un Aruba di 5 strea na cada ciudadano di e pais aki. Un Aruba unda lo reina prosperidad bou di cada ciudadano,  sigur unda e ciudadano por cana riba su propio pais sin ningun temor pa criminalidad, un enseñansa unda cu nos lo por ta hasta un ehempel como un pais di conocemento, un cuido medico excelente y un infrastructura ehemplar y sigur lo combati pobresa y desempleo den e pais aki.

Costo di bida halto 
Pero ironia di bida ta cu cada hogar cu bo bishita bo ta constata cu e prosperidad cu a ser priminti na pueblo no ta existi. Costo di bida halto tin nos ciudadanonan asota. Nos pueblo su entrada no ta yega mas. Cada hogar ta haci tur tipo di sacrificio pa por tin cuminda na mesa y cumpli cu su obligacionnan basico pa por sobrevivi. Bo ta combersa cu mayornan y hopi ta masha preocupa con lo haci un biaha mas pa por duna nan yiunan lo necesario pa e aña escolar nobo y sigur pa locual ta pagonan na scol. Den hopi hogar mayornan tin di traha dos trabao pa por cumpli cu nan famia y asina ta sacrifica oranan di ta cu nan famianan pa asina por duna nan yiunan lo necesario pa acudi na scol y sigur pa por tin un tiki pa nan por recrea.

Calidad di enseñansa 
Den cada hogar bo ta wak cu tin hopi temor pa e ola di criminalidad cu ta asota e pais aki. Sigur algo preocupante pa e ciudadano pero sigur tambe pa nos aerea di mas importante cu ta nos turismo. Pueblo na 2009 a ser manipula cu lo tin un plan pero te dia di awe tur hende tin culpa di esaki menos esnan cu mester asumi nan responsabilidad. Hecho ta cu enseñansa ta keda cu su retonan principalmente si no ta inverti lo necesario den esaki. Kier papia di mehora calidad pero te dia di awe no por haya empleo den nan propio pais y sigur e gobierno aki ta manda e mas mal señal na nos hobennan pa locual ta educacion.

Cuido medico 
Cada hogar cu bo drenta ta duna di conoce cu nos cuido medico ta laga di desea y principalmente nos grandinan ta ser neglisha. Y ki garantia nos lo tin cu cuido medico lo mehora cu e hospital nobo aki, mientras cu uno mas chikito mes nos no por garantisa cuida na nos ciudadanonan. Falta di dokter y sigur cu nos tin hobennan cu a caba den nos regio cu ta un reto pa por defini nan status pa asina nos por awe no tin un solo liña den ensenasa pa un isla chikito.

Evaluacion critico 
Scarsedad di docente y sigur di actornan importante pa yuda e docentenan den nan trabao cu dia pa dia ta bira mas pisa. Hopi hoben eyfo ta dropout debi cu nos enseñansa mes structuralmente ta conduci na esaki. E poco hobennan cu ta gradua tin mas yiu di tera ta traha pa mehora nos cuido medico. Pa locual ta infrastructura nos por wak sigur mehoracion y sigur esaki ta necesario pero ta keda na cada ken pa cualifica si cierto inversionnan tabata necesario enbes di aloca esaki den infrastructuranan deportivo, escolar cu ta den hopi mal estado. Ta keda na cada ken pa evalua si tabata mas mihor pa inverti pa crea parkenan recreativo pa nos hobennan, inverti den mehoracion y funcionamento di Centronan di Bario.
Nos ta den aña di eleccion y un biaha mas pueblo lo tende promesanan pero ta keda na cada ciudadano pa evalua pa su mes si enberdad nan ta sinti cu locual a ser priminti na 2009 di crea un Aruba di 5 strea a ser cumpli y si nan lo kere un biaha mas den un continuacion di un vision desde 2009. Ta keda na cada  ciudadano pa haci un evaluacion critico paso bo voto ta di sumo importancia y sigur lo marca e futuro di e pais aki y di nos yiunan y futuro generacionnan.

Expresionnan haci den e articulo aki no necesariamente ta refleha opinion di ArenaPoliti.co