ORANJESTAD -  Prome Minister Mike Eman durante e bishita na e brug nobo di Green Corridor, a señala cu Gobierno di Aruba cu e ta lidera, intencionalmente a scoge pa e ruta aki pa construi Green Corridor, contrario na e otro plan cu lo a pasa den varios cunucu y lo a causa hopi daño na nos medio ambiente. 

E caminda di 4 via di Green Corridor ta cuminsa banda di aeropuerto y ta yega te Pos Chikito. Despues di e bario aki, a drecha y construi camindanan na ambos banda di e trayecto principal cual lo mehora e fluho di trafico pa e area pariba.  Prome Minister Eman a splica cu hopi aña pasa ora a cuminsa papia di e proyecto  “vierbaansweg”, esaki lo a cruza den hopi tereno panort di Aruba, varios cunucu lo a desaparece, hopi area berde lo a keda afecta. “Nos a bisa cu nos no tabata kier a sigui cu e trace historico cu tabatin y nos a scoge pa haci e “vier-baans” te unda cu por , dentro di e mesun espacio cu nos tabatin caba, minimalisando e efecto riba nos naturalesa. Esey tabata un escogencia berde hopi grandi, pasobra nunca antes a mira e posibilidad di ehecuta e proyecto aki salvaguardiando tur e areanan berde cu pais Aruba tin. Nos a haci e esogencia importante ey. Esey a duna nos di biaha e inspiracion pa bisa cu esaki ta Green Corridor, pasobra nos a haci escogencianan berde importante pa por scapa hopi area cu den tur e debatenan den historia cu tabatin riba e proyecto aki lo a afecta enormemente medio ambiente di Aruba.” 

Escogiendo pa construi Green Corridor na e sitio actual, a logra toch pa trece un cambio importante den infrastructura, alabes mehorando calidad di bida di e ciudadanopnan bibando riba e ruta di Pos Chikito te na San Nicolas. “Riba henter e ruta por mira cu na e banda di caminda tambe tin mehoracion, cu troittoir, service road, etc. Un progreso social grandi pa nos hendenan, hunto cu e 13 parkenan chikito cu tin riba e ruta di Green Corridor.”

E schedule ta poni cu e prome fase di Green Corridor, e parti di caminda y brug lo mester keda cla pa fin di juli y cuminsamento di augustus, mientras cu den e otro fase cu mester finalisa pa december, mester caba cu e 13 parkenan y e parti di embeyecemento na banda di caminda.

Expresionnan haci den e articulo aki no necesariamente ta refleha opinion di ArenaPoliti.co