E hecho cu Prome Ministro Mike Eman a anuncia cu gobierno lo sera e dump na Parkietenbos merece hopi atencion. E pregunta cu pueblo ta hasciendo ta di con awo… 4 luna prome cu Eleccion ??

For di 1996 y 1998 rapportnan ta informa gobierno cu e dump NO tin espacio pa bai mas anja y cu lo tin material peligroso pa salud publico riba e dump…y pa tal motibo tanto HASKONING como VROM a conseha gobierno pa sera e dump inmediatamente.

Conseho di departamento di VROM a ensera un evaluacion critico di 8 sitio alternativa unda lo por inicia un dump nobo y e departmento a conseha pa inicia un dump nobo na locual nan ta jama ‘afgraving Barcadera’ cu ta un sitio di 16 hectare y lo por bai pa e sigiente 32.7 anja como e proximo dump. Lastimamente Ni gobierno di MEP NI gobierno di AVP NO a dedica atencion na e conseho y awe ta casi 20 anja despues y ainda e dump ta na Parkietenbos perjudicando e pueblo di Parkietenbos y vecindario.

PPA no ta comparti e inversion duna pa otro cu e decision di gobierno di MEP pa den pasado 2007/2008 cumpra un asina jama ‘planta di Wastaway ‘ como un decision cu lo a solucciona henter e problematica di e dump na Parkietenbos. E compra di e planta tampoco a nifica e final di e ‘dump’ na Parkietenbos. Pakiko ?

Na prome lugar e planta di ‘WastaWay’ tabata di un ‘unproven technoligy’ cual ta nifica cu No por tin ningun momento garantia cu e planta lo a funciona completamente correcto. Fuera di esaki e WastaWay plant lo por a atende/ kima 100.000 ton di sushi mientras cu e tempo ey Aruba tabata manda 200.000 ton di sushi cual ta nifica cu un dump di 100.000 ton lo a keda mientras cu lo tin mas ton di sushi cu lo a bai dump a consecuencia di e crecemento di pais Aruba. Cual ta nifica sin compra di un otro planta y hasta kizas 2 mas lo NO por a garantisa e final di e dump di Parkietenbos ningun momento. Tur esaki mientras e rapportnan tabata senjala cu e dump tabata un peliger pa salud publico di pueblo di Parkietbos y vecindario.

Pesey PPA ta di opinion cu e compra di e planta WastaWay NO tabata indica ningun soluccion di e problematica di dump di Parkietenbos.

E hecho cu awe durante e campanja pa eleccion di e proximo parlamento di Aruba cu Prome Ministro Mike Eman ta declara cu lo bai sera dump na Parkietenbos ….no mester worde mira como un decision serio …pero mas un declaracion di campanja..pasobra casi 8 anja largo Prome Ministro Mike Eman NO a preucupa cu e pueblo di Parkietenbos y vecindario…

PPA lo soluccion e problematica di DUMP basa riba e rapportnan existente y un evaluacion critico na momento cu PPA regresa den parlamento di Aruba y consecuentemente den gobierno di pais Aruba a base di otro rapport cu por tey. Realidad politico ta cu tanto AVP, MEP y fundador di POR a faya seriamente den con pa atende e problematica aki.


Aruba, 14 juni 2017
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co