ORANJESTAD – Pa lider di Gabinete Mike Eman II, e meta nunca tabata mas cla cu aworaki. El a reitera esaki na su salida for di e foro ehecutivo internacional cu a tuma luga e siman aki y cu e tabatin e honor di realisa e apertura. “Pa nos ta hopi importante cu den contexto di turismo sostenibel, busca con nos por haci pa e industria turistico no ta bira un peliger pa naturalesa, cu por provee trabou y entrada, pero tambe un tipo di modelo social economico caminda tin ekilibrio y equidad den e forma con ta reparti e bienestar den comunidad.”

E mandatario a splica cu si tin algo cu a resalta den hopi pais turistico ta cu tabatin hopi crecemento di GDP; na Aruba tambe ta asina. A bay di 100 mil turista pa 1 miyon turista, pero no semper nos pais tabata exitoso den traduci e progreso economico den un bienestar social. E mira, devocion y dedicacion di Gabinete Mike Eman II no ta solamente pa bisa cu nos cifra economico ta crece, pero cu e calidad di bida di nos hendenan tambe ta crece.

“Busca e ekilibrio entre desaroyo economico y desaroyo social, pa nos ta esencial,” Premier Eman a declara. E ta splica cu cada bes ta tuma un stap importante den pone enfasis riba calidad di bida, calidad social ya cu tur ta desemboca den un bienestar hopi mas sostenibel.

E hecho cu Professor Sam Cole kende ta e experto cu a conseha Aruba pa busca un desaroyo ekilibra, ta presente na Aruba pa e forum aki, a yena Prome Minister cu hopi satisfaccion. Professor Cole a laga Premier Eman wak, algun aña pasa cu no ta solamente loke inversionistanan haya importante mester guia nos, pero tambe e ciudadano cu ta carga e desaroyo.

Pesey e mandatario a pidi Professor Cole pa tira a un bista un rato rond di Aruba. Por ehempel e barionan cu ta renobando y e conexion riba algo cu e mes a pone enfasis riba dje: Tur esaki ta haci cu bo economia y bo turismo ta bira mas sostenibel ora bo tin wowo pa naturalesa y tin wowo pa un desaroyo socio economico hopi mas ekilibra y husto.

“Awo Aruba ta wordo poni como ehempel na mundo; modelo di escogencianan corecto caminda no ta wak solamente cifra, pero tambe hende,” Minister President Mike Eman a bisa. E ta admiti cu tin hopi mas pa wordo haci y p’esey mes pueblo a duna mandato riba e di dos parti di e palabracion cu Gabinete Mike Eman a haci cu nos comunidad y esey ta cu ‘Ainda Falta.’

Esey ta loke a papia durante e forum, esta con ta sigui desaroya bo industria turistico di un forma cu ta sostenibel y cu na final esnan cu ta beneficia di dje ta esnan cu ta carge, cu ta nos ciudadanonan, cu miho scol pa nan yiunan, cu miho cuido pa nos grandinan y un forma cu nan tambe por tin satisfaccion cu Aruba ta un destinacion grandi y respeta. “Esey ta e ekilibrio cu nos ta busca y mi ta kere cu Aruba ta yegando un poco mas cerca di e meta aki, cu nunca ta termina, pero semper bo mester aspira pa yega mas leu,” asina Premier Eman a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co