Partidonan di oposicion ta na fabor di CFT. Nan a tene fiesta cu e raportnan di CFT y ta boga pa e tipo di maneho di austerisacion cu CFT ta na fabor di djie. Djies lesa e raportnan di CFT, scucha e partidonan MEP y PDR pa tende con nan ta na fabor di CFT. Mientras cu ta mas cu bisto cu e maneho di reformanan gradual pero structural, e reduccion di gastonan gradual y inversionnan den renobacion di nos pais ta dunando resultado, specialmente MEP ta sigui boga pa medidanan estilo CFT. E raportnan di CFT ta papia cla den con nan ta wak cu e maneho lo mester ta y ta pesey oposicion ta aplaudi e maneho estilo "medida di MEP" cu nan ta propone.

MANEHO DI CFT
CFT kier aumenta entrada di gobierno entre otro cu mas belasting manera un medida cu aumento di BBO di por lo menos 6%. CFT kier corta gasto di gobierno den e forma cu ultimo simannan nos a tende hende bisa cu mester kita 2000 trahado di gobierno, sin bisa con nan y nan famia lo mester biba. AVP ta bisa cu mester reduci e gastonan di personal den por ehempel tres forma: 1) reforma di e fondo di pensioen cu ya a tuma luga. Mientras a salba e fondo pa futuro a reduci e costo pa gobierno tambe. 2) Reduci gasto di personal den un forma natural: ora hende kita for di trabou of bay cu pensioen no ta yena e cupo ey cu hende nobo. 3) Stimula hende pa bay traha den sector priva. Pero esaki ta posibel solamente ora tin cuponan di trabou nobo den sector priva. Pa crea e cuponan nobo aki AVP ta stimula economia y inversion den areanan nobo di nos economia y door di sector priva. IMF ta sostene esaki!

CONSECUENCIA
E consecuencia di e maneho di CFT ta bisto den paisnan di Reino mes of den Europa caminda a austerisa sin misericordia. Awor den campaña pa eleccion otro luna, tur partido politico na Hulanda, specialmente esnan cu a goberna, ta bisa cu no por tin mas austerisacion! Despues cu e daño a wordo haci ta grita no mas! Wak kico e maneho di CFT a causa economia, clima di inversion, mercado laboral y bida social na nos pais ruman Corsow. For di 2010 CFT a tuma over e maneho financiero di Corsow. CFT no ta conseha so, pero exigi cortamento di gasto sin wak consecuencia y dicidi kico por y kico no haci cu placa di Corsow mes. E consecuencianan pa economia di Corsow ta cu e crecemento a stagna y no ta crece for di 2010 mas cu 1-1.5% pa aña. Desempleo a keda halto rond di 11%. E situacion social di comunidad a bay atras. E mes un situacion nos ta wak por ehempel na Sint Maarten y na Hulanda. Ta e consecuencianan di e maneho di CFT aki cu AVP no kier pa Aruba. Tur esnan cu si ta na fabor di CFT mester carga e consecuencia di e maneho anti-social di CFT. Tur esnan cu ta sconde tras di CFT pa haci politica, cu ta boga pa Hulanda impone CFT na Aruba, apesar di cu IMF ta bisa cu nos ta riba bon caminda, mester bisa pueblo cu ora cos pega, ta nan ta carga e consecuencia y no pueblo! Na mester carga e consecuencianan di un CFT en caso cu nan mal deseo pa Aruba bira realidad un dia. Por lo pronto esey no lo sosode pasobra AVP en todo caso ta contra di CFT. No tin duda den esey!

Expresionnan haci den e articulo aki no necesariamente ta refleha opinion di ArenaPoliti.co