Un comunidad mas integro ta cuminsa cu nos mes.

"Nos por papia y debati di integridad sin caba nunca. Nos por acusa otro di no ta integro y crea e impresion cu nos si ta. Pero eseynan no ta suficiente. Si cada uno di nos actua den forma integro tur ora y den tur situacion, tambe "ora hende no ta wak", nos ta haci hopi mas pa un comunidad mas integro. Leynan no tey pa haci nos actua corecto y integro. Leynan tey pa corigi esnan cu no ta." Esey tabata e reaccion di e lider di AVP riba e articulo di e lider di MEP den prensa den fin di siman pasa. "Papia no ta suficiente. Haci. Nos mester comporta den forma integro tur ora y tur caminda."


INCONSISTENCIA DI MEP
Den e documento cu e lider di MEP a presenta aña pasa e ta lansa un sin fin di acusacion contra su opositornan. Pero ora cu mester a aplica reglanan di integridad, di transparencia, di responsabilisacion pa actonan di miembronan di su propio partido MEP y di su mes, e no a cumpli. Rene Herde': "Ki bal nos papia di integridad of hasta traha regla y leynan pa mas integridad, pero ora di aplica nan pa tur hende, bo ta e prome pa haci excepcion pa bo mes. Ki bal haci comosifuera integridad ta importante, pero ora yega na actua den forma integro, ta busca tur sorto di excusa pa no actua den forma integro, transparente, y responsabel."


LEY Y REGLA
Fraccion di AVP den Parlamento ta boga pa haci tur lo posibel pa mehora integridad den tur area di nos comunidad. Pa logra esaki ta trahando riba e ley y reglanan di integridad den politica, na nivel di partidonan politico, di gobierno y di parlamento. E necesidad di mehora comportacion integro, transparente y responsabel den sector publico, semi publico y sector priva tambe ta bisto. Cada biaha cu algo incorecto sosode y no actua den forma transaparente y responsabilisa pa loke a sosode, nos ta haci comportacion incorecto acceptabel. Esey no por! Rene Herde:" Ley y reglanan pa mehora comportacion integro mester conta pa henter nos comunidad. E principio di "ley pa un, ley pa tur" mester conta pa tur hende. Sin excepcion. Politiconan, lidernan social, comercial, lidernan den tur sector, tin tambe e responsabilidad ta duna e bon ehempel y actua den forma integro tur ora y tur caminda. No por mustra dede riba otro y no actua corecto nos mes." Asina Rene Herde a declara.

Rene Herde a sigui bisa cu Fraccion di AVP no ta lanta acusacion sin motibo manera MEP ta haci tur dia y manera e lider di MEP tambe ta haci den su ultimo articulo. Loke si e fraccion di AVP ta haci, ta asumi su responsabilidad y atende tur acto cu no ta cumpli cu ley, reglanan di integridad o cu moral civico y moral. E accidente di e miembro di e fraccion di MEP mester a conduci na por lo menos medidanan disciplinario como miembro di MEP y sigur como miembro di parlamento. Como polis e sa bon kico e procedura ta pa tur otro hende cu haya nan mes den un accidente. Pero e no a aplica esaki pa su mes. E cuenta di banco di e bufete di abogado desconoci "ERIS CRIUS" mester a conduci sikiera na un envestigacion di parti di e partido MEP y di Ministerio Publico. E mester tabata motibo pa e lider di MEP mes duna cuenta (= responsabilisa como miembro di parlamento/ duna transparencia) na Parlamento y na comunidad. Te awe esaki no a sosode.  

Expresionnan haci den e articulo aki no necesariamente ta refleha opinion di ArenaPoliti.co