Enbez di cambia e sistema bieuw pa uno simpel, efectivo y cu menos peso pa pueblo y comercio! 

E critica di e lider di MEP riba e cambionan den e sistema di belasting di nos pais, a cay masha malo serca practicamente tur hende na Aruba y na Hulanda. Ta net didje cu ta experto den cobra belasting, algo cu ela studia pe, a spera cu e lo aplaudi esaki pa motibo di e hopi bentahanan di e sistema nobo. For di Hulanda a bini e reaccion "wat wil zij dan wel"? Ta masha di lamenta cu hasta un cambio pa haci loke e lider di MEP mes ta bisa, esta "paga belasting. Pero no dimas", e ta sali y critica comosifuera e ta un medida.

Rene Herde', lider di fraccion di AVP a elabora riba esaki: "E bentahanan di e cambionan den e sistema di belasting ta obvio y mi ta 100% sigur cu e lider di MEP como experto di cobra belasting, ta sostene. Pero ta parse cu pa motibonan politico partidista, e no kier bisa cu e ta di acuerdo. Pero e conoce e bentahanan hopi miho cu cualkier un di nos. Laga mi menciona algun bentaha. E retraso den cobra belasting lo wordo reduci hopi y kisas hasta elimina. E molester cu hende ta haya cu cobransa belasting di añanan atras ta wordo elimina. E sistema ta wordo simplifica. Door di esey henter e administracion cu un famia mester haci pa djies yena su papelnan di belasting ta wordo reduci enormente, door di cu hopi lo wordo haci sinta tras di bo computer na cas y via internet. Pa loke ta e cantidad di belasting cu un hende ta paga, esaki no ta subi. Pa entradanan mas abou e lo wordo hasta reduci. Otro tiponan di belasting ta wordo elimina. Por ehempel e belasting riba herencia. Ta cuanto famia ta pasa door di hopi molester djis pa haya loke ta di nan pa ley. Esey lo wordo elimina. E restraso pa gobierno haya placa di belasting pa e traha cun'e tambe ta wordo elimina. Awor aki tin mas cu 2 biyon florin na belasting atrasa cu gobierno no ta haya. Door di e falta di capacidad organisatorio pa cobra belasting, gobierno a keda sin haya e belasting. Door di esaki gobiernonan den pasado y awor a bay fia placa pa cubri gastonan normal. Si lo a haya hasta mitar di loke tin na belasting riba caya, gobierno no lo tin deficit riba presupuesto y lo por a cuminsa kita debenan di ultimo 29 aña mas lihe. Por ultimo, cu e ABB lo elimina e BBO acumulativo y dificil pa administra pa tur comerciante, lo haci cu tur hende na Aruba, turista, pueblo di Aruba, hasta hende cu keda aki illegal, lo paga e ABB aki sin e inflacion cu BBO a causa y manda prijsnan halticimo. Ta bini aserca cu lo por elimina otro belastingnan manera e "health tax". Awor si bo wak tur e benhanan aki, ta con bo por ta contra? Ta un conclusion so por tin: MEP ta contra pa drecha loke no ta funciona Aruba. MEP ta contra cambionan cu ta sigura nos tur un miho futuro. MEP ta contra pa duna pueblo y comercio alivio! Loke si MEP mes ta bisa cu e kier, ta pa hisa e BBO manera nan kier a haci for di 2008. Entre otro pesey MEP kier pa CFT wordo impone via un KB na Aruba. Ta pa CFT impone e BBO cu tur su aspectonan negativo cu MEP kier contra pueblo." Asina Rene Herde' a bisa papiando di e refroma di hopi cos den aparato di gobierno. E ta wak cu hopi cos ta sosode y na fabor di pueblo di Aruba. Contrario na e medidanan cu MEP tabata impone riba pueblo, pa despues pueblo wak cu e placa tabata bay den saco di algun "friends and family" di gobernantenan di MEP.Awor pueblo ta wak unda su placa ta bay!

Expresionnan haci den e articulo aki no necesariamente ta refleha opinion di ArenaPoliti.co