Aruba a wordo sacudi e siman aki pa dos caso di agresion contra hendenan conosi den nos comunidad. Prome tabata un cabesante di scol cu a wordo agredi pa 4 hoben na scol den oranan di atardi. Despues di dos dia dos dokter canando den centro di cuidad a wordo agredi pa 8 persona. Dos sucedido cu a laga tur hende den shock. Esakinan ta senjalnan di inseguridad extremo riba nos isla, ora ni riba bo propio pais bo no ta sigur mas. Mientras cu comunidad ta den shock, bo no ta scucha nada di e minister encarga cu husticia. Ta manera cu e no tin ningun sorto di interes. Presupuesto di Cuerpo Policial a wordo corta cu 6 miyon florin pa 2015, y sin e inversion aki ta con Cuerpo Policial por hasi Aruba mas sigur?

MINISTER HOOIJBOER TA ADMITI CU A CORTA DEN PRESUPUESTO

Mientras tanto ta bon pa lesa cu minister Hooijboer mes a admiti cu el’a corta 1 miyon florin den seguridad di scolnan riba e post ‘bewakingsdiensten’. Pero ta keda cuestionabel cu mientras cu Aruba ta birando mas insigur e minister di ensenjansa ta cortando den seguridad di scolnan. Minister a delibera cu SIMAR, pero tanto bal, pasobra si no tin placa riba presupuesto, no por hasi nada toch. Ta bon cu e minister mes a admiti esaki den un comunicado, pasobra mientras e ta corta 1 miyon florin den seguridad di scolnan, el’a presupuesta casi 8 miyon pa otro proyectonan incluyendo Rietveld Academie. Awor cu e tambe ta conciente di esaki, e por aproba nos proposicion pa reduci e proyectonan ey, y aloca e 1 miyon florin bek den seguridad di scolnan y docentenan.

Expresionnan haci den e articulo aki no necesariamente ta refleha opinion di ArenaPoliti.co