E ta bisto cu di basta dia Minister Eman tabata buscando un excuus pa asina por haya hustifica e perdida di credibilidad politico door di su welga di hamber contra e intervencion di Hulanda pa su mal gobernacion. A busca conseho y a laga un cantidad di hurista scirbi articulo riba e tema aki pa por influencia e opinion publico, pero esaki no a surti. Ta siman pasa numa Minister Eman a haya algo pa purba saca cara y hustifica tur locual ela bisa y haci den cuadro di e KB. Ta trata aki di e conseho di Raad van Advies den cual ta poni cu e KB no lo tin base legal. Minister Eman a indica di no por contene su alegria pa e noticia aki. Pero Minister Eman mester realisa cu no tin nada cu por hustifica su welga di hamber ya cu e mandatario mes a bay di acuerdo pa e intervencion aki.

E KB no a bin ‘zomaar’ sino tabata e conclucion di un caminda largo cu a wordo encamina door di Conseho di Minister di Reino pa por haya un bista berdadero den e situacion financiero di Pais Aruba. Na varios ocacion Gabinete Eman a firma protocol cu Hulanda y tambe a duna palabra cu nan lo brinda e informacion necesario. Pero na Aruba nos tabata sa caba cuanto manipulacion tabata tin cu cifranan di finanzas publico y tambe e gañamento constant cu tur cos ta ok a cuminsa bira dimas. E rapportnan di Profesor De Vries a laga hopi ta pensa, e rapport di IMF a habri wowo di hopi, y e downgrading di Aruba door di Standard and Poor’s y Fitch a confirma cu e situacion financiero di nos Pais na man di Gabinete Eman ta hopi malo. Pesey na momento cu Gabinete Eman y e mayoria den Parlamento a nenga di tene na cuenta e conseho extenso di Raad van Advies riba presupuesto 2014, Conseho di Reino por medio di Gobernador a pone un paro na e actonan aki di mal gobernacion.

Nos mester tene na cuenta cu Reino a base di articulo 43 di Statuut tin e obligacion pa salvaguardia entre otro e bon gobernacion na cada Pais cu ta forma parti di Reino. Pesey tur e senialnan di mal gobernacion na nos Pais no por a keda sin cu nada ta wordo haci contra dje. Minister Eman tabata sa di antemano cu e intervencion aki lo a bin. E mandatario mes a firma na 2013 e Protocol di Diahuebs Santo, e tabata di acuerdo cu e carta di ‘geen bezwaar’ di ex Minister Yrausquin di 6 di februari 2014 y e mandatario tambe a bay di acuerdo cu e decicion di Conseho di Minister di Reino di 7 februari 2014 pa asina CFT bin haci un investigacion financiero na Aruba. Pesey awe Minister Eman no por bisa cu ela lucha pa nos autonomia, pasobra e mes a PALABRA pa ENTREGA e autonomia financiero di nos Pais na Hulanda door di su mal gobernacion di nos Pais. Pues Minister Eman no por bisa cu e no tabata sa di nada y cu e intervencion di Hulanda a gare di sorpresa.

E welga di hamber di Minister Eman tabata djies un acto di desesperacion y cobardia di no por acepta e realidad, bisa e berdad y asumi responsabilidad. Pesey ni cuanto excusa wordo busca, nada lo por hustifica e welga di hamber di Minister Eman.

28 oktober 2014

Expresionnan haci den e articulo aki no necesariamente ta refleha opinion di ArenaPoliti.co