Perspectiva Independiente without background 001

Cambio den Kiesverordening: argumento, e proceso legislativo y un ‘boycott’ [entrevista]

Dangui01Pa hopi tempo caba un posibel cambio di nos Kiesverordening a keda un topico di discusion. Ta trata di un cambio pa percura cu e secuencia di cua candidatonan riba un lista ta bira parlamentario bay a base di cantidad di voto enbes di posicion (number) riba lista. Ora parlamentario di MEP sr. Dangui Oduber a entrega un iniciativa di ley pa realisa e cambio aki, hopi a spera di wak e tratamento den Parlamento di e concepto di ley aki prome cu eleccion. Esaki te ainda no a tuma luga.

ArenaPoliti.co a aserca sr. Dangui Oduber pa repasa e proceso legislativo cu a tuma luga te na e momentonan aki, su argumentonan pa e cambio en cuestion y pakico e ta di opinion cu fraccion AVP y presidente di Parlamento sra. Wyatt-Ras a ‘boycotea’ tratamento di e ley aki. Sr. Oduber tambe ta contesta si MEP lo aplica e cambio proponi pa e eleccion venidero, y si e manera di parti restzetels tambe merece un cambio.

Kico ta bo argumentonan/hustificacion pa introduci e cambio aki den nos kiesverordening?

Dangui Oduber: “Mi ta kere cu un miembro di Parlamento mester tin e apoyo di e votado pa e por representa e votado den Parlamento di Aruba. Den mi opinion e unico mecanismo pa midi si un politico tin e apoyo di e votado ta a base di conteo di e votonan cu e politico ricibi y no e posicion (number) cu un lider di partido duna e politico riba un lista politico. Mirando cu mas persona ta participa na eleccion den mi opinion un comparacion ta necesario, pues esun cu tin mas voto personal tin cu bay dilanti y drenta Parlamento.”
Den mi opinion e unico mecanismo pa midi si un politico tin e apoyo di e votado ta a base di conteo di e votonan cu e politico ricibi …”

“Ora un politico sa cu a base di e cantidad di voto cu e ricibi e por drenta Parlamento di Aruba y cu e no ta depende di ningun hende, e por eherce su tarea como Miembro di Parlamento na un forma mas independiente dunando asina tambe mas contenido na articulo III.16, paragrafo 3, di Nos Constitucion, esta cu cada Miembro di Parlamento mester vota segun su propio pensamento (stemmen zonder last).”

Con e proceso legislativo a bay? 
Dangui Oduber: “E proceso mes a cuminsa for di December 2016 na momento cu mi persona a dirigi un carta na prome minister di Aruba Mike Eman pa puntre kico ta posicion y pensamento di gobierno di Aruba referente e cambionan cu mi ta proponiendo.
Na prome luga mi a studia nos Constitucion, e Kiesverordening, e Memorie van Toelichting di e Kiesverordening y tambe literatura (Handboeken) riba e tereno aki na Aruba y otro paisnan den Reino y hunto cu mi colega di partido Evelyn Wever-Croes y conseheronan nos a traha un iniciativa di ley pa cambia e Kiesverordening y tambe nos a traha un concept Memorie van Toelichting. E dos documentonan aki ami y colega Evelyn Wever-Croes a entrega cerca Presidente di Parlamento di Aruba riba 28 maart 2017 cu e peticion pa e proceso legislativo cuminsa cana. Mi a entrega tambe un copia na Raad van Advies y Directie Wetgeving en Juridische Zaken.”
170823 dangui parlamento“Raad van Advies a revisa e iniciativa di ley y a manda su conseho pa presidente di Parlamento di Aruba riba 10 mei 2017 cu na su turno a comparti esaki cu e miembronan di Parlamento.

Nos a revisa e conseho di Raad van Advies y a base di esaki nos a ahusta e iniciativa di ley y e concept Memorie van Toelichting, cu nos a entrega na Raad van Advies y na Presidente di Parlamento di Aruba.”
Lamentablemente presidente di Parlamento di Aruba a desvia di e sistema usual y riba peticion di un miembro di fraccion di AVP a pidi un conseho di Sociaal-Economische Raad.”

“Despues di esaki nos a puntra presidente di Parlamento di Aruba pa pone un fecha pa e iniciativa di ley wordo trata. Lamentablemente esaki no a tuma luga ya cu un miembro di Parlamento a pidi presidente di Parlamento di Aruba pa pidi un conseho na Sociaal-Economische Raad. Pa medio di un carta Sociaal-Economische Raad a informa Presidente di Parlamento di Aruba riba 28 juli 2017 cu e conseho di Sociaal-Economische Raad a wordo manda pa Minister di Algemene Zaken.” 
170823 dangui
Pakico bo ta di opinion cu fraccion AVP y/of presidente di Parlamento sra. Mervin Wyatt-Ras a ‘boycotea’ tratamento di e ley aki?
Dangui Oduber: “Ora cu nos a cambia e iniciativa di ley pa cambio di e Kiesverordening y e concept Memorie van Toelichting conforme e conseho di Raad van Advies y nos a adresa tur comentario di Raad van Advies, e iniciativa di ley pa cambio di e Kiesverordening por a wordo trata den Parlamento di Aruba. Lamentablemente presidente di Parlamento di Aruba a desvia di e sistema usual y riba peticion di un miembro di fraccion di AVP a pidi un conseho di Sociaal-Economische Raad.

Fuera cu e procedimiento aki ta inusual, e ta contra e Landsverordening Sociaal-Economische Raad (AB 1987 no. 103), cu ta prescribi den articulo 2, cu Sociaal-Economische Raad ta conseha Gobierno di Aruba riba peticion di un of mas minister y tambe nan por conseha Gobierno riba nan propio iniciativa. Presidente di Parlamento di Aruba mester a informa e miembro di fraccion di AVP cu su peticion pa pidi un conseho di Sociaal-Economische Raad ta contra leynan di Aruba y pone un fecha pa e iniciativa di ley wordo trata. Si Gobierno di Aruba y/of un di su ministernan tawata kier a haya un conseho di Sociaal-Economische Raad, nan mester a puntra esaki. Segun e leynan di Aruba esey no tawata e funcion di presidente di Parlamento di Aruba. 

Mirando con esaki a bay ta mustra cu a trata na pospone e votacion di e ley aki pa despues di eleccion pa Parlamento di Aruba.” 
Presidente di Parlamento di Aruba mester a informa e miembro di fraccion di AVP cu su peticion pa pidi un conseho di Sociaal-Economische Raad ta contra leynan di Aruba y pone un fecha pa e iniciativa di ley wordo trata.”

MEP lo aplica e concepto di secuencia di voto pa eleccion 2017 a pesar cu e no a bira un ley?
Dangui Oduber: “Nos di MEP ta para tras di e iniciativa aki y nos ta kere den dje. E ta un decision di congreso di partido cu a wordo ratifica den partijraad. Nos no mester firma ningun protocol y ningun gentleman’s agreement pa nos por tene nos mes na dje. Sinembargo e no ta ancra den ley te ainda. Nos di MEP y ami personalmente a keda hopi desapunta cu e ley no a wordo trata ainda.”
Nos no mester firma ningun protocol y ningun gentleman’s agreement pa nos por tene nos mes na dje.”

Bo ta di opinion cu e sistema di parti restzetels tambe mester di un cambio? Pakico si/no?
Dangui Oduber: “Tin hopi opinion y pensamento referente e reparticion di restzetel. Pa haci e cambionan aki e ta rekeri cambionan mas drastico den bo kiesverordening. E regla number 1 di nos kiesverordening ta cu e partido mester por yega na un asiento (kiesdeler) y berdad ta hopi biaha un partido chikito ta yega hopi serca pero toch no ta logra. E reglanan di wega ta cu e partido mester saca asiento prome.
E sistema actual ta traha diferente ya cu ta trata di un sistema di “grootste gemiddelden”. Ta sigur cambionan cu nos mester por pensa riba nan y considera pa haci’e mas democratico posibel.”
170823 carta ser
Imagen: carta di SER relaciona cu conseho di SER riba e ley di iniciativa di sr. Dangui Oduber pa cambia Kiesverordening
Dangui Oduber: “For di maart 2017 nos a presenta e concepto di ley di iniciativa pa laga e politico cu mas voto drenta parlamento!

Fraccion di AVP a boycotea e tratamento di ley aki promer cu recess usando e argumento cu nan kier conseho di Sociaal Economisch Raad (SER) promer cu trata esaki.
Wel, e CONSEHO ta CLA y pueblo ta pidi presidente di parlamento pa yama e reunion aki promer cu Eleccion!!!”


ArenaPoliti.co
tambe a puntra lider di fraccion di AVP, sr. Marlon Sneek, su opinion riba e cambio di secuencia y e posibel necesidad pa cambia e sistema di parti restzetels. Na momento di publicacion di e articulo aki ArenaPoliti.co no a ricibi contesta di sr. Sneek riba e preguntanan ainda. Su contestanan lo wordo publica riba ArenaPoliti.co si nos ricibi nan.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.