Angel Bermudez: “A yega ora pa nos cuminsa actualisa nos sistema presupuestario”
Despues di un conferencia exitoso cu IMF.
Oranjestad –Aruba, 25 Mei 2015: Despues di un tayer sumamente exitoso cu Fondo Monetario Internacional (IMF) riba e topico di “Medium-Term Budget Frameworks” cu a clausura diabierna ultimo, Minister di Finanzas, Angel Bermudez a keda sumamente satisfecho cu e compromiso y entusiasmo di parti di e coordinadornan di presupuesto como tambe colaboradonan di diferente departamento entre otro Finanzas, Asunto Economico, Banco Central y demas participante.
Minister Bermudez a expresa na varios ocasion cu ainda ta analisando diferente manera pa vigila y controla e ehecucion di nos presupuesto, pues durante e dos dianan aki cu IMF, a permiti tur gremio concerni y participante elabora detayadamente riba tur aspecto necesario pa ehecuta un sistema presupuestario na termino medio di un forma exitoso.
“Di aña pasa nos a cuminsa cu preparacionnan hunto cu Banco Central pa cambia e procedura di nos presupuesto di uno statico pa dinamico, pues na cierto momento bo mester por traha un presupuesto pa un periodo multianual y compronde con esaki por forma parti di bo procedura presupuestario”, e mandatario a splica.
Minister di Finanzas ta sigur cu e tayer aki a habri un caminda mas pa e desaroyo di nos sistema di presupuesto cu ta forma parti tambe di e reforma fiscal cu actualmente ta tumando luga. “A yega ora pa nos sigui amplia nos conocemento den e tereno aki y tambe actualisa nos forma di pensa riba con nos mester continua y mehora e sistema di presupuesto cu nos ta uzando pa e ultimo 30 aña caba”.
Expresionnan haci den e articulo aki no necesariamente ta refleha opinion di ArenaPoliti.co