Nos a tuma nota di e defensa di Minister Oduber den e asunto di pago di alarma pa cas cu placa di Pueblo, den cual e mandatario kier tilda opocicion di ta hiba un politica degenera ya cu ta trata di seguridad di hende. Nos mester recorda Minister Oduber cu e issue politico nunca tabata seguridad di hende of den e caso aki di su famia y su persona. Locual nos ta cuestiona y condena ta e hecho cu Minister Oduber a insisti pa Pueblo paga pa instala alarma na su cas siendo cu ley no ta permiti esaki. Ta danki cu ambtenaarnan a para e abuso aki dos biaha, e mandatario no a logra su meta. Purba saca curpa di e abuso aki scondiendo tras di seguridad di hende y refiriendo na e gastonan di ex minister Croes manera cu Minister Oduber ta trece dilanti den su defensa, ta un dieptepunt den e politica cu e mandatario aki ta scohe pa hiba. Minister Oduber mester compronde cu Pueblo no ta kens y nan tambe por lesa y compronde tur e cartanan di Ministerraad y di Departamento di Finanzas cu ta mustra con e minister a persisti pa Pueblo paga pa un alarma cu e mandatario mes por a paga di su salario. E cartanan ta papia palabra cla y ta prueba e degeneracion politico di Minister Oduber.

Expresionnan haci den e articulo aki no necesariamente ta refleha opinion di ArenaPoliti.co