E presencia di un posibel reapertura di e refineria a inicia un discussion super cayente den nos sociedad encuanto e  sea reapertura di e refineria versus un ALL INCLUSIVE HOTEL pero e realidad ta cu gobierno NO a duna pueblo a informacion di contenido di ningun alternativa.

CITGO:

No tin un MOU cu CITGO pa ningun hende juzga segun Ministro Mike de Meza cual ta nifica cu esaki mester worde negocia ainda.

PPA ta di opinion cu lo mester tin hopi mas cu un MOU mester tin un ‘business-plan’ completo cu lo mester ta accompanja cu cierto garantianan. Un business plan cu ta ensera e inversion den nos refineriay na ki tempo esaki ta tuma lugar. Durante presencia di sr. Nelson English na Aruba el a splica cu pa un reapertura di e refineria responsabel cu lo duna garantia di un periodo di funciona di diez anja of mas lo mester inverti entre 2.5 billion pa 4 billion dollar.

Ultimo 5 anja gobierno Venezolano kier a bende CITGO….palabranan di e presidente Chavez q.e.p.d. tabata …”un inversion malo cu ganashi minimo” y nan kier a bende CITGO pa 10 biyon dollar…nan no a hanja esaki como offerta pero entre 6 pa 7 billion locual a pone cu nan NO a bende. Si nan a pone CITGO presta pa medio di ‘bonds’ e suma di 5 billion dollar cu lo mester worde paga dentro di 5 anja (2022). E pregunta ta cu CITGO bao di e circumstancia aki lo ta cla pa presta otro 3 of 4 billion dollar pa inverti den e refineria di Aruba ?  Cu otro palabra basa riba kiko ministro de Meza ta declara cu CITGO ta ‘fit & able’ pa e reapertura aki ?  Of e ‘fit & able’ ta mas tanto mara na crudo Venezolano pa un periodo y cuanto anja e garantia aki lo worde duna ?  PPA ta kere tambe pa forza un acuerdo/garantia di un scol di refineria  estilo LAGO  pa juda prepara e generacionan di futuro pasobra  ultimo tambe Valero  y contratistanan a exploita cu masha hopi trahador di exterior…….!!!

UN HOTEL ‘ALL INCLUSIVE; ?

Cuanto e pueblo di Aruba realmente sa di e contenido di e contract entre BAHIA PRINCIPE y gobierno ?

Ta worde bisa cu lo tin mester di 1000 trahador pa construi e Hotel aki cuanto lo ta trahador local di Aruba  y cuanto lo ta permisonan pa trahador bin traha pa e periodo di construccion ??

Ora e hotel  BAHIA PRINCIPE habri cuanto arubiano lo hanja oportunidad den staf di e hotel y cuanto  trahadornan di Hotel lo ta arubiano/local  y cuanto lo ta permiso duna pa trece trahador di exterior ?

A garantisa cu material necesario lo worde cumpra pa medio di e comercio local ……y solamente den cierto excepcion lo por trece di exterior …..y lo mester paga ‘invoerrechten’ etc..!!

A garantisa cu asina jama ‘Shoppingcenter di Bahia Principe’  lo mester duna espacio na comercio local tambe …y cuanto porciente di e shoppingcenter aki ??



PPA ta di opinion cu pueblo NO a ricibi e informacion completo pa realmente por huzga e bon y menos bon di sea ‘reapertura’ di e refineria pa CITGO of un ALL INCLUSIVE HOTEL  pa BAHIA PRINCIPE. Pueblo mester demand mas informacion di nos gobernantenan.


Aruba, 19 di augustus 2015                                             Lider Politico di PPA

                                                                                            BENNY NISBET

Expresionnan haci den e articulo aki no necesariamente ta refleha opinion di ArenaPoliti.co