ORANJESTAD – Diamars atardi Prome Minister Mike Eman, hunto cu Richard Blewitt, coordinador di Nacionnan Uni di nos area y Kees Rade, embahador di Desaroyo Sostenibel na Hulanda a hisa bandera di Nacionnan uni na dr. Edward Cheung Center for Innovation. E acto simbolico aki tabata relaciona cu reunionnan cu tabata tumando luga na e centro di innovacion di Aruba entre diferente stakeholdernan local y internacional.

Coordinador di Nacionnan Uni, Richard Blewitt tabata na Aruba relaciona cu preparacionnan pa establece un Centro di Excelencia di Nacionnan Uni na Aruba. Sr. Blewitt a probecha e occasion pa reuni cu miembronan di Dialogo Social, incluyendo Prome Minister, representando gobierno di Aruba, tocante e 17 ‘Sustainable Development Goals’, cu recientemente paisnan rond di mundo a acepta como metanan mundial pa combati pobresa, protehe nos medio ambiente y segura prosperidad pa henter mundo como parti di un agenda di desaroyo sostenibel. E meta ta pa dentro di 15 aña, na tur pais na mundo, e metanan aki por bira un realidad.

Stakeholdernan presente tabata representantenan di SIMAR, ABV, SPA, STT, SEPPA, AHATA, ATIA, Camara di Comercio, Aruba Timeshare Association y Prome Minister. Interes den e topico tabata halto mirando cu esnan presente a participa activamente cu hopi pregunta pa e representante di Nacionnan Uni.

Despues di e reunion a hisa e bandera di Nacionnan Uni, pa sigui cu reunionnan entre Prome Minister di Aruba, sr. Blewitt y representantenan di UNDP (United Nations Development Programme), Rocky Mountain institute, Carbon War Room, Clinton Climate Innitiative, Carilec, TNO, Universidad di Aruba y Utilities.

Un dia yena cu reunionnan caminda Aruba a haya un toke mundial cu presencia di Nacionnan Uni, cu na comienso di aña benidero, ta bay establece un Centro di Excelencia na Aruba. Una bes cu e centro di Nacionnan Uni keda estableci otro aña lo por mira e bandera di Nacionnan Uni permanentemente na dr. Edward Cheung Center for Innovation.

Expresionnan haci den e articulo aki no necesariamente ta refleha opinion di ArenaPoliti.co