Hopi ta e bishitantenan cu ta sacando potret na e murayanan na San Nicolas 

Diahuebs anochi a tuma luga inauguracion oficial di e prome murayanan di Aruba Mural Projects. Den u ambiente unico Minister di Cultura, Sr. Otmar Oduber a hiba palabra bisando cu ta un placer pa mira un vision pa crea un districto cu un enfoke di nos herencia cultural, poco poco birando un realidad. E meta principal ta pa atrae mas bishitante na San Nicolas pa cera conoci cu nos cultura por medio di e artenan riba muraya.  

Obranan crea pa artistanan local conhuntamente cu nan amigonan, hobennan y henter e ekipo di AMP cu a traha incansablemente pa por a logra e bunita murayanan aki. Un proyecto di casi 5 luna cu envolvimento di henter e comunidad di San Nicolas. Hobennan di diferente scol a participa pa por a haya e oportunidad pa forma parti di AMP cu tayernan extensivo di pintura riba muraya. AMP a percura pa un aire positivo cu e lansamento di e prome fase di e proyecto pintando henter e edificio di Old Barber Shop completamente biña y haci henter e area limpi pa demostra con arte por contribui na bienestar social di nos comunidad.

Minister Oduber a anuncia cu e inauguracion di e murayanan di AMP, cu esaki ta un inicio di un cantidad di actividad cu lo sigui. "Ya caba varios artista a mustra interes pa forma parti di e di dos fase di AMP, pa sigui pinta sigui mustra e desaroyo artistico riba e murayanan" e mandatario a confirma.

San Nicolas lo ta e punto di enfoke mirando e cantidad di cambionan cu e ta conociendo. Recientemente a anuncia e restauracion di Nicolaas Store cual ta situa den mesun caya cu e Watertoren cual otro aña ta e sede di un museo industrial.  E mandatario a sigui anuncia: "E siman nos dilanti lo inicia cu trabounan infrastructural pa percura pa embeyecemento di  henter caya principal na San Nicolas. Na mes momento ta preparando pa inicia cu e espacio pa artesanonan riba nos isla tin un luga propio pa crea nan obranan cual lo ta bou di direccion di CRAFT, cu tambe ta forma parti di henter e conhunto cultural na San Nicolas."

Minister Oduber a gradici cada un cu a forma parti di e proyecto bunita aki cu sigur ta lansa un etapa nobo pa San Nicolas. Masha hopi hoben tabata presente unda un grupo a presenta nan baile di break dance. E exito di AMP ya caba por ser mira riba rednan social unda varios bishitante y localnan a pone nan "selfies" cu e murayanan aki. Ta potretnan cu sigur ta wordo mira rond henter mundo y ta propaganda cultura di Aruba.

Esaki ta e entusiasmo cu ta reina y ta yama e proyecto di AMP un caluroso bon bini.

Expresionnan haci den e articulo aki no necesariamente ta refleha opinion di ArenaPoliti.co