Dia 20 di november ta dia internacional di Mucha. Ariba e dia aki un cantidad di pais ta concientisa nan poblacion encuanto derechonan di mucha y ta evalua con leu ta cu ehecucion di tratadonan pa loke ta e derechonan aki. Muchanan tin diferente derecho, esta di tin un nomber y identidad, di haya cuminda y awa  limpi pa bebe, di haya cuido, educacion y ensenjanza, di tin proteccion for di maltrato y abuso, di tin un bon calidad di salud y hygiene, di tin oportundad di expresa nan opinion y wordo skucha.

Na e ocasion aki fraccion di AVP a bishita skol di EPB, unda cu e studiantenan ta bezig cu un proyecto di “Good for the Neighbourhood” di plantacion di berdura den un greenhouse. Ta bunit a pa mira con entusiasma e muchanan ta presenta na matanan di berdura y fruta na e miembronan di e fraccion.

Segun Wyatt-Ras a base di un estudio cu Unicef na anja 2011-2012 a haci na Aruba a ser recomenda cu lo mester bin un maneho integral cu tin cu introduci leynan pa cu Hubentud. Ta rekeri alavez consulta di gobierno cu organisacionnan y sector priva pa implementa maneho. Por cierto a tuma nota cu e plan di maneho lo keda entrega awe na Conseho di Minister. E specificico a menciona diferente area pa bin cierto cambio manera Salubridad, ensenjanza, proteccion y participacion. Pa loke ta trata salubridad entre otro tin cu atende cu obesidad hubenil cu tin un cifra alarmante (35% di muchanan cu ta bai skol basico ta obeso). Ta recomenda deporte pa mucha, stimula babynan pa bebe lechi materno y educacion sexual como parti di curriculum na tur skol.

Pa loke ta trata ensenjanza por bisa cu esaki ta forma mas o menos 6.7% di os Producto Bruto Nacional; 99% mucha chikito ta bisita skol basico. Ora e muchanan bira mas grandi tin menos mucha homber cu mucha muher cu ta bishita skol secundario y tin mas mucha muher cu mucha homber cu ta haci un estudio avanza. Puntonan cu lo tin cu traha ariba ta entre otro fortifica nos ensenjanza, integracion di nos muchanan cu caba skol ariba mercado laboral, aumenta acohida despues di skol pa mucha di skol basico y pa hobennan.

Pa loke ta trata proteccion por bisa cu e cifras di 2013 di buro Sostene mi a indica cu e cantidad di casonan di negligencia, maltrato y abuso di mucha ta basta halto, esta 309 caso. Ta necesario prevencion cu ta tumando lugar caba dor di diferente fundacion y fortifica e buro Sostene Mi. Alavez e ley di centronan di mucha lo mester wordo actualisa y implementa.

Pa loke ta trata participacion por bisa cu hopi biaha nos ta dicidi algo sin consulta cu nos hobennan mientras na mesun momento nos ta bisa cu hobennan no ta motiva of no ta participa. Aki ta necesario pa skucha nos hobennan mas ainda.

Expresionnan haci den e articulo aki no necesariamente ta refleha opinion di ArenaPoliti.co