Oranjestad – Recientemento Departamento di Recurso Humano conhuntamente cu Gamma IT Solutions y Fondo Desaroyo Aruba (FDA) a oficialisa e proyecto ‘Personeel Informatie en Management Systeem’ (PIMS) cu lo haci e procesonan di recurso humano den e aparato Gubernamental (cu ta conta cu alrededor di 4000 empleado) mas eficiente y efectivo, asina Minister di Finanzas, Angel Bermudez a splica diamars ultimo.

Segun sr. Bermudez for di 2 aña pasa caba, na momento cu e la asumi e cargo di Minister di Finanzas, un di e sorpresanan grandi cu e la topa cun’e tabata precisamente e sistema y proceso anticua di traha di e departamentonan cu ta resorta bou di dje. “Tabata tin un cantidad grandi di bevordering, huramentacion y landsbesluit cu atraso enorme.”

Minister Bermudez a splica cu dilanti e situacion aki, e tabata sigur cu e digitalisacion, automatisacion y optimalisacion di e proceso di trabou tabata hopi necesario. ”Pa realisa henter e proceso di actualisa e sistema lo tabata tin mester di aproximadamente entre 300 pa 400 empleado extra pa haci e trabounan aki, bo ta ripara cu a yega momento pa digitalisacion.”

Na mes momento e mandatario di finanzas a gradici Sr. Veel di Gamma IT Solutions pa cu contribucion na e proyecto aki y tambe Sr. Roos di FDA ya cu e plan aki tabata uno cu basta aña den tapara y awor a bira un realidad. Minister Bermudez a enfatisa cu e mehoracion y actualisacion aki mester cuminsa na e doño di trabou, “Si Gobierno kier duna un bon servicio na comunidad, nos mester cuminsa como doño di trabou na duna nos empleadonan e atencion cu nan merece”.

E mandatario a expresa cu e ta hopi contento cu a logra formalisacion di e proyecto di ‘PIMS’ pa asina DRH por continua cu e trabounan necesario di manera mas efectivo y eficiente posibel manera debe ser y tambe ta spera cu pronto ta formalisa proyectonan adicional, cu tambe ta forma parti di e plan grandi aki, manera e ‘HR beleid’ y ‘Verantwoordelijke Besef’ bira un realidad.

Finalmente Minister Bermudez ta desea henter e ekipo di DRH, cu ta forma parti di e proyecto aki, tur clase di exito.“Mi ta reconoce cu banda di e compromisonan laboral cu ya caba e empleadonan di DRH ta conta cun’e, proyectonan manera esaki ta exigi di henter e ekipo pa ‘walk the extra mile’ pa haci su ehecucion uno exitoso den su totalidad”.

Expresionnan haci den e articulo aki no necesariamente ta refleha opinion di ArenaPoliti.co