Rene Herdé (AVP): Ley nobo di pensioen ta sigura pensioen pa futuro y baha su deficit
Dialuna awor Parlamento lo trata e ley pa reforma di e systema di pensioen di ambtenaarnan y maestronan di scol. Acceptacion di e reforma di e fondo di pensioen di APFA lo nifica cu ta caba di baha e deficit (= e falta di placa pa cubri e pensioennan) di 800 miyon cu e tabata na 2008 pa 0 florin (= cero florin) na januari 2015. Pa logra esaki gobierno tin cu inverti di biaha 170 miyon florin. Cu e cambionan aki ta elimina e riesgo pa por paga e pensioennan cu tabata tin for di 2008. E pensioennan existente y e pensioennan di futuro ta miho sigura awor.
CAUSA DI E CRISIS DI PENSIOEN
Tin dos causa di e crisis pa fondonan di pensioen. E prome ta e crecemento rapido di e cantidad di hende cu ta bay cu pensioen y cu ta keda biba hopi aña mas. Esaki ta sosode den tur pais moderno caminda calidad di bida, salud y cuido medico a percura pa hende biba mas salud y mas largo cu prome aya. E didos motibo pa e crisis den fondonan di pensioen ta cu na 2008/2009 e crisis financiero-economico mundial a causa cu hopi fondo di pensioen a perde hopi di nan inversionnan. Na algun pais hende a perde tur nan pensioen. Na otro paisnan, entre otro na Hulanda mes, a baha e pensioen pa por sigui paga e pensioennan. Of a hisa e edad di pensioen mas ainda. Na Aruba esaki no a sosode. Tanto e pensioen di behez (AOV) como APFA a keda paga e pensioen mensual pa tur nan pensionadonan sin kita un florin. Cu e reparatietoeslag di gabinete Mike Eman, mei mei di e crisis mundial, a hasta aumenta e pensioen. Pero pa logra e seguridad di e pensioen den futuro, tur e miembronan di APFA mester contribui un tiki. Tanto e pensionadonan existente, como e pensionado di futuro cu awor ta trahando ainda. Tur ta duna di nan parti, pa sigura e pensioen pa tur hende pa futuro. Gobierno ta contribui cu 170 miyon florin. Pero e pensioennan ta keda sigura tur luna.
Expresionnan haci den e articulo aki no necesariamente ta refleha opinion di ArenaPoliti.co