ORANJESTAD -- Presupuesto 2016 cada biaha ta duna mas sorpresa. Lider di MEP a splica. 

"Ora cu bo kiere cu gobierno ta scucha su pueblo, bo ta equiboca pasobra Gabinete Mike Eman NO ta scucha su pueblo. Unda cu bo bai, e preocupacion mas grandi ta e criminalidad y especialmente e inseguridad cu nos ta sinti debi na esaki. Mayornan no ta trankil ora nan yiu bai scol, hobennan no por sali destrai trankilamente, nos no por laga nos grandinan na cas mas nan so. Bo ta sinti bo insigur den bo cas y bo ta sinti bo insigur riba caya, y tur hende ta boga pa combati criminalidad cu man mas duro.
Gremionan a trese nan ponencia fuerte dilanti, y hasta un minister di e propio gabinete MIke Eman a bisa cu criminalidad ta for di control.
Locual ta mas di lamenta ta cu esnan cu mester hasi e pais aki mas sigur, ta nenga di hasi'e. Den presupuesto pa 2016, e mayoria di ministerionan gasto ta aumenta, pero hustamente pa HUSTICIA  e ta wordo corta. Esaki por mira riba e grafico adhunto.
Tambe por corta den salubridaddi salubridad, danki na e medida di BAZV cu e parlamentarionan di AVP a pasa, cu ta pone cu gobierno por baha e gastonan na salud pasobra pueblo ta page atravez di e medida di BAZV.
Pero pa corta den husticia net na e momentonan aki mas critico, no tin ningun pero ningun hustificacion.
Nos mester manda un senjal cla y raspa pa criminalnan cu nan no por take over. Nos no por sigi hasi e mesun cos y spera otro resultado. Y door di corta den presupuesto di husticia, ta peor so e situacion ta bira. Nos ta lamenta esaki, y nos lo percura pa aloca suficiente fondo bek pa HUSTICIA pa asina nos por combati criminalidad cu man duro", tabata palanranan di lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co