Parlamentario Andin Bikker lider di Partido Democracia Real a papia fuerte tocante expresionnan di minister di salubridad, tocante e funcionamento di laboratorionan priva.

Bikker ta haya cu dicho mandatario mester drecha cosnan cu ta kibra y no bay sinta drecha cosnan cu no ta kibra.

E parlamentario a cuestiona e minister su speech durante apertura di e Landslaboratorio nobo di Hospital unda el a bisa cu e laboratorionan aki no ta funciona of cu nan ta mal certifica, of nan ta paga pa nan wordo certifica.

Bikker a pone su mes como ehemplo di un persona cu ta haci tests den un di e laboratorionan aki y e no tin keho riba dje y tampoco den pueblo el a tende cu tin keho.

El a bisa cu diripiente e Minister aki tin keho y purba drecha cosnan cu no ta kibra y den e proceso e ta ofende tur e personanan cu ta traha den e laboratorionan priva, ademas, esnan cu ta duna certificacion “comosifuera nan ta bay daña nan bon nomber pa haya mal nomber na Aruba pa un certificacion” textualmente el a bisa.

E ta sugeri e minister pa drecha y adresa e berdadero kehonan cu tin riba salubridad, entre otro cu hendenan mester warda masha largo mes pa haya un cita cu specialista, of ora un hende pacientnan ta ser descarta pa e docter pa cierto malesanan.

 “Mi no por compronde con un Minister di Salubridad, cu tin un cartera asina importante, ta bay concentra riba cosnan cu ningun hende ta keha riba nan y cu ta funcionando perfectamente”, Minister di Salud a subraya.

Bikker a haci un apelacion na minister Schwengle pa e reflexiona un rato y coregi su expresionnan haci cu no ta husto, caminda e ta ofende personanan y institucionnan internacional, cu a certifica e laboratorionan aki anto sin cu tin base.

Segun Bikker, e minister aki awor a yega y hasta di carambola a bira minister, mientras cu fraccion di PDR tin seis aña  bayendo pa siete den Parlamento y a bay pa un eleccion caminda cu pa 26 voto nos a hera un asiento, pues PDR ta representante di pueblo di berdad, Bikker a bisa.

PDR si ta scucha pueblo di berdad, y pa añanan largo a bringa e lucha pa e docternan cu ta studia den nos region y lidera pa nan haya reconocimento pa nan diploma, pero te awor no a mira un landsbesluit bin Parlamento caminda e minister ta adresa e situacion aki.

“By the way, nos ta hayando remarcanan di yiunan di tera cu a studia afo, cu ta den hopi dificultad pasobra nan a studia regio y nan diploma no ta wordo reconoci y nan ta bin cu yen di excuse pa hinca nan den un skina, pa nan no traha akinan”…

Biker ta haya cu esaki no ta husto y el a bolbe bisa e dignatario pa “drecha e cosnan cu ta robes y no bay sinta purba drecha cosnan cu no ta kibra”.

Expresionnan haci den e articulo aki no necesariamente ta refleha opinion di ArenaPoliti.co