Partido Movimiento Electoral di Pueblo ta trahando fuertemente planificando solucionnan real pa e problemanan grandi cu Aruba ta pasando aden. Manera ta conoci cu e debe nacional a keda redobla den apenas 6 aña di AVP cual den boca di pueblo ta popular como e MEGA DEBE. Consecuentemente esaki a causa multiple problemanan grave pa nos dushi isla Aruba. MEP ta cla pa cualkier reto y lo sa di usa su boluntad y inteligencia pa rescata e pida baranca aki cual ta na rand di bancarota. Como partido Social Democrata lo percura pa e ser humano ta central atrobe.  Un di e proyectonan cu MEP ta visualisa ta entre otro introduccion di inmediato di e proyecto “ARUBA BAN TRAHA” cual proyecto ta encera institui un Banco di Desaroyo. Kico esaki ta encera? Un Banco cu interes special atractivo cu lo duna sosten stimulando e generacion nobo di empresarionan local pa inverti y haci nan soño bira realidad creando negoshinan chikito y mediano. Negoshinan chikito y mediano lo crea un spin off effect unda esakinan lo crea cuponan di trabao pa nos pueblo. Banco di Desaroyo lo duna guia durante e promer aña na e empresario por ehempel lo yudabo den e proceso administrativo cual ta un parti importante di tur negoshi. Alaves lo brinda e guia pa atende cu belasting, payroll etc etc. Pues e Banco di Desaroyo no obstante lo stimula empresarionan cu un interes atractivo pero  realmente lo tene e man di e empresario nobo, cana cun’e durante un tempo shouder cu schouder promer cu e lag’e bay completamente riba su mes. Asina por garantisa tambe un negoshi sea chikito of mediano pero sostenibel y duradero.  MEP ta kere den e proyecto aki “Aruba ban traha”. Cu Bo confiansa nos lo percura pa realisa esaki.

Expresionnan haci den e articulo aki no necesariamente ta refleha opinion di ArenaPoliti.co