Diamars 19 April 2016, e Hof di corte comun a duna su veredicto den e caso di e ‘Boutique Hotel Zissu’ (KG 2728/15 ghis 77855-H 41/16). Interesante den e veredicto aki ta e motivacion 2.5. 

Motivacion 2.5: ‘Het Hof constateert dat Zissu thans beschikt over de benodigde bouwvergunning en hindervergunning. Verder zijn de te ontplooien commerciële activiteiten thans in overeenstemming met de bestemming van het perceel, nu de erfpachtbestemming bij notariële akte van 5 januari 2016 is gewijzigd..’

Pues e sentencia a sali na fabor di ‘Boutique Hotel Zissu’, pasobra e ‘erfpachtbestemming’ a wordo cambia y e construccion a bay ‘conform een door de Dienst Openbare Werken af te geven bouwvergunning’. Loke e motivacion aki ta bisa, cu despues cu ‘Boutique Hotel Zissu’ tabata (casi) cla, e ‘erfpachtbestemming’ a wordo cambia riba 5 januari 2016. Sin e cambio di ‘erfpacht’, un permiso di construccion no por wordo duna. Pero straño ta cu e proyecto tabata (casi) cla dia cu e la haya e permisonan legal. Pues con un proyecto por a wordo ehecuta sin e permisonan necesario, pa despues bira legal?

Locual e corte a confirma, ta locual a para bira normal aki na Aruba. Awendia hopi construccion ilegal ta tumando luga, cu of sin cooperacion di e algun departamento di Infrastructura, pa despues core ‘legalisa’ e acto ilegal cu un permiso di construccion of cambio di ‘erfpacht’. Hopi di e legalisacionnan aki, ta sosode despues cu e ‘afortunado’ a haya un ‘krabbeltje voor akkoord’ di e minister. Cu tur e actonan ilegal ta trece problema of molester den bario, parce cu esaki no ta importante mas. Cu diferente leynan ta wordo kibra of cu un minister ta abusa di su ‘discretionaire bevoegdheid’, tampoco no ta importante mas. Anto e no ta nada straño cu e trankilidad den diferente bario a disparce, e insiguridad a aumenta y hopi hende cu a bin for di exterior ta kere cu ta nan ta doño pasobra nan tin acceso directo na e ‘krabbeltje’ di e mandatario. Con pueblo su interes ta wordo sirbi asina? Kisas esaki ta wordo haci intencionalmente, pa semper tin e excuus politico di cu e lo ta dificil pa implementa un bon y transparente maneho di orden teritorial manera tur cos ta bruha caba?

Den e caso di ‘Boutique Hotel Zissu’, a wordo mustra claramente cu gobierno mes a causa e problema pa despues ‘legalisa’ e infraccion. E veredicto ta mustra tambe, cu bay corte no ta yuda. Pasobra esun cu a actua contra ley, sa mientrastanto cu e por logra legalisa su infraccion despues via e mesun departamentonan cu tin cu duna y controla permiso. Preguntanan:

1. Kico ta e reglanan pa cambia ‘erfpachtbestemming’ y kende ta dicidi pa cambi’e?
2. Dicon construccionnan ilegal ta wordo legalisa despues, enbes di castiga?
3. Dicon e poder hudicial no por tene cuenta cu e ‘algemeen belang’ y e principionan di bon gobernacion, manera tur hende sa cu e podernan ehecutivo y legislativo no ta funciona aki na Aruba?
4. Ki dia e interes di pueblo ta wordo sirbi y cuanto mas abuso e pueblo aki tin cu wanta di mal gobernantenan?

(www.aboaruba.org , info@aboaruba,org )

Expresionnan haci den e articulo aki no necesariamente ta refleha opinion di ArenaPoliti.co