Minister Sevinger, despues di presentacion y recorido riba sitio di construccion na hospital 

ORANJESTAD - Minister di Infrastructura Sevinger hunto cu Prome Minister Eman tabata presente na hospital pa haya un presentacion di e contratista Arellano riba e avancenan den e construccion cu ta canando segun plan. Tambe nan a bishita tur cu ta trahando den hospital riba nan dia special 'Dia di Enfermeria'. Minister Sevinger a keda contento di por a haya un recorido na e sitio di construccion como tambe pa por a saluda y felicita e enfermero y enfermeranan riba nan dia.

Minister Sevinger: "Pa loke ta e parti di construccion, esaki ta segun schedule. Nos por a mira e comparticionnan cu ta bin den e hospital nobo. E ta un mehoracion grandi pa comunidad di Aruba. Cambernan actual di seis pashent ta bira camber pa dos of un pashent. Ta bay tin ekiponan moderno cu por duna un cuido di calidad. Esaki sin duda ta nifica un mehoracion grandi pa Aruba. E nivel di duna servicio ta bay hisa enormemente." Minister Sevinger a manda palabranan di pabien na Prome Minister Mike Eman, Minister Alex Schwengle, na directiva y gerencia di hospital y na tur empleado di hospital cu di un of otro forma ta contribui na e proyecto aki, na AIB, na DOW, SOGA, Infrateam y naturalmente na comunidad di Aruba. "Probablemente na luna di december caba e prome pashentnan ta bay ta den e parti nobo di hospital pa asina por cuminsa cu e trabou di renobacion di e parti existente. Ora na 2018 e hospital nobo ta cla y e parti bieu renoba, nos pais ta na un nivel unda servicio di calidad halto ta bay wordo duna. Na prome luga pa nos ciudadanonan y despues pa nos bishitantenan."

Sevinger a splica cu na inicio di Gabinete Mike Eman a haci 4 di e proyectonan mas grandi cu tabata den lachi tira pa binti, trinta aña, un prioridad. "Nan ta Green Corridor cu ta encera un vierbaansweg, mudamento di waf di Barcadera, e ringweg rond di Oranjestad y hospital nobo. Tur cuatro ta andando na e momentonan aki. Infrateam hunto cu tur otro ministerio - di finanzas, educacion, salud, husticia etc. - y expertonan local y internacional ta percura pa e parti di infrastructura ta cana manera mester cana pa e proyectonan wordo ehecuta. Esaki ta un vision di gobierno unda tur ministerio ta hunga un rol importante na bienestar di comunidad."

Na final Minister Sevinger a manda palabranan di felicitacion tambe na tur hende cu ta traha den cuido medico riba 'Dia di Enfermeria'.

Expresionnan haci den e articulo aki no necesariamente ta refleha opinion di ArenaPoliti.co