Sr. Guillfred Besaril (MEP): "Ley di Tabaco y hisamento di edad pa bendemento di alcohol ta iniciativanan positivo pero incompleto"
Recientemente e Ley di Tabaco y hisamento di edad pa bendemento di alcohol a keda aproba pa Parlamento di Aruba. Segun Parlamentario pa Fraccion di MEP, sr. Guillfred Besaril, e ley y e cambio riba nan mes ta iniciativanan positivo cu ta pone e salud di cada individuo na prome luga. E Parlamentario a menciona si, cu tin dos aspecto importante cu no a tene cuenta cun’e den e cambio di Ley di benta di alcohol:
1. "E prome aspecto cu no a tene cuenta cun’e ta cu na Aruba no tin un ley di identificacion obligatorio, esta e asina yama “identificatieplicht”. E ley di alcohol ta prohibi benta di alcohol na menornan di 18 aña di edad y den su texto ta referi na e ordenansa di ID-card. E ordenansa aki ta reglamenta e rekesitonan necesario na cual e documento mester cumpli cun’e pa e documento ta uno legal y nada mas. Na Aruba niun hende ta obliga na cana den luganan publico cu algun forma di identificacion, manera cu si ta e caso den otro paisnan. E hecho aki ta dificulta e trabao di control riba e cumplimento di e leynan den practica. Fraccion di MEP durante tratamento di e ley den Staten, a trece padilanti cu mester bin un ordenansa pa regula e aspecto di identificacion obligatorio na Aruba. E ley aki ta sumamente necesario pa un control optimal di e leynan manera di alcohol, tabaco y hasta enseñansa obligatorio (Leerplicht) di parti di e autoridad competente".
2. Un otro punto cu Parlamentario Besaril a trece padilanti ta cu den e cambio di ley di alcohol no a ataca esnan mayor di edad - y cu si por cumpra alcohol legalmente - cu ta cumpra esaki y ta bira suministr’e na menornan di edad: "Den caso asina e ley no ta stipula un castigo of multa pa e persona mayor di edad cu ta suministra alcohol na e menor di edad. Tin un sin fin di ehempel den paisnan grandi manera Merca, caminda suministracion di alcohol na un menor di edad ta castigabel pa ley ya cu e uso y abuso di alcohol por tin daño permanente na e hobennan. Mirando cu e ley aki a wordo diseña specialmente pa proteha e hobennan na Aruba di abuso di alcohol, Fraccion di MEP ta di opinion cu a laga aki algun buraco habri den e ley cu Staten lo mester bay atende cu nan lo antes posibel, si di berdad nos kier cumpli cu e proposito di e cambio di Ley", Parlamentario Besaril a termina.
Expresionnan haci den e articulo aki no necesariamente ta refleha opinion di ArenaPoliti.co