Resultado di prome dia di reunionnan na Hulanda. 

E prome dia di reunionnan na Hulanda entre e delegacionnan di e parlamentonan di Aruba, Corsow y St Maarten a duna un bon resultado caba. E tres delegacionnan a pone e ultimo man na un concepto di ley di reino ("rijkswet") pa un "areglo d conflicto" pa e cuatro paisnan di Reino. (E "geschillenregeling") For di januari e aña e tres parlamentonan aki a traha na un concepto di ley, pa duna asina nan contribucion pa regla e asunto importante aki mas lihe posibel. Rene Herde cu ta den e delegacion na Hulanda y cu ta atende cu e tema aki pa hopi aña caba, a splica e importancia di e concepto di ley cu e tres parlamentonan hunto lo presenta. Rene Herde': "Nos tin hopi aña ta purba yega na un forma pa soluciona diferencianan di opinion entre paisnan den Reino. Nos kier un areglo asina pa evita cu ora tin diferencia di opinion entre dos of mas pais, cu esaki bira un cnflicto grandi cu consecuencianan indesea. Aña pasa nos a palabra na cua exigencianan un areglo asina mester cumpli. E delegacionnan di e cuatro parlamentonan, tambe di Hulanda, a acorda y ratifica despues e exigencianan pa un areglo di conflicto efectivo. Awor nos mes ta presenta un concepto di ley cu ta cuadra completamente cu e tres exigencianan cu nos a acorda. E minister Hulandes sr Plasterk, tambe a presenta ya tres biaha un proposicion di ley. Pero su proposicionnan no ta cumpli cu e exigencianan cu nos a palabra. Pesey su proposicionnan a wordo desaproba door di nos tres parlamentonan y e tres gobiernonan di Aruba, Corsow y St. Maarten. Enbez di warda y wak kico ta bini di gobiernonan, nos tres parlamentonan a dicidi di traha un propio di ley. Esey ta cla awor y e siman aki nos lo present'e na nos coleganan di Hulanda."

APROBA LEY
Awor e proceso ta drenta un fase nobo. Awor tin dos concepto di ley riba mesa. Esun di minister Plasterk cu no ta cumpli cu e exigencianan cu nos a acorda y e proposicion cu nos ta propone. E proceso di discuti e leynan pa yega na un concepto final ta cuminsa. Apesar di cu ta Parlamento Hulandes lo mester aproba un ley asina y e parlamentonan di Aruba, Corsow y St. Maarten no tin voz den esaki, Rene Herde ta keda optimista: " E miembronan di Parlamento di Aruba, Corsow y St Maarten por presenta ideanan, mocionnan, amiendanan y henter leynan manera ta e caso awor y tambe debati cu e miembronan di Parlamento Hulandes. Na final ta e miembronan di Parlamento Hulandes so por vota riba e ley. Pero e echo cu nos a acorda e exigencianan na cua un ley asina mester cumpli cun'e, ta haci cu ta masha dificil pa miembronan di Parlamento Hulandes desvia di loke nan a palabra y ratifica, y aproba algo cu no ta cuadra cu e exigencianan. E palabracionnan aki entre parlamentonan ta duna mi confiansa cu - apesar di e oposicion contra di un areglo asina den Parlamento Hulandes - tog nos lo logra un bon areglo na final. Tanten cu esey no ta e caso, nos lo sigui haci tur cos pa yega na un areglo cu ta sigura veredictonan final den disputanan entre e cuatro paisnan door di un corte independiente. Nada menos cu esey!" Asina Rene Herde a declara despues di pone su firma bou di e documento cu e tres delegacionnan a acorda ayera na Den Haag.

Expresionnan haci den e articulo aki no necesariamente ta refleha opinion di ArenaPoliti.co