Durante rueda di prensa semanal di Gobierno di Aruba, Minister Otmar Oduber a indica cu den e simannan nos dilanti, hunto cu Aruba Airport Authority y Oficina di Turismo lo presenta cifranan positivo pa locual ta trata e expansion den cantidad di vuelonan di algun aerolinea. E temporada di winter ta premira di bira uno hopi positivo pa locual ta trata e cantidad di asientonan adicional cu ta bin pa Aruba. Vuelonan cu no solamente ta sali for di Merca pero tambe for di otro destinacionnan.  Entre otro ya caba e aerolinea Canades WestJet a anuncia e siman aki cu lo añadi Aruba riba nan schedule di vuelonan internacional pa e winter 2016/2017. E vuelo nobo aki ta cuminsa for di fin di october.
Minister Oduber a probecha pa anuncia tambe cu na september proximo Aruba despues di mas of menos 20 pa 25 aña ta habri un mercado nobo cu ta Mexico. Mexico City ta e pais cu a wordo identifica despues di un analisis cu a wordo haci ultimo añanan y cu despues di hopi aña cu nos a concentra riba mercadonan specifico den Merca. E mandatario ta ilustra cu Merca ta conta cu 15 gateway y keto bay ta enfoca riba e mercado di Dallas y lo kier añadi un gateway mas specificamente pa Dallas. "Dallas ta importante pasobra e oportunidadnan cu tin den e plataforma cu Dallas ta ofrece cu entre otro American Airlines, sigur ta bale la pena pa nos mester por haci e esfuersonan pa mira si nos por logra e mercado aki." Minister Oduber ta amplia. E strategia cu a scoge den e aerolinea nan ta sumamente importante diversificando for di e mercadonan cu nos tabata depende di nan pa hopi aña cu ta e region di entre otro Boston, New York y alrededor. Dallas sigur ta parti di e strategia pa sigui diversifica den e mercado di Merca, y por mira con e resultadonan positivo ta tumando luga den e strategia di diversificacion cu a tuma luga den Merca.
Den e simannan nos dilanti lo continua anunciando mas expansion den cantidad di vuelonan di algun aerolinea pero tambe di Barconan Crucero. Tur esaki ta traduci cu e temporada di turismo nos dilanti lo ta uno hopi halto y hopi positivo.

Expresionnan haci den e articulo aki no necesariamente ta refleha opinion di ArenaPoliti.co