E prome Accion di Bario a ranca sali diahuebs mainta ora cu Prome Minister Mike Eman tabata presente den e bisindario di Pos Chikito. Tabata relevante pa e mandatario comunica directamente cu habitantenan di e bario, teniendo na cuenta e desaroyo grandi cu esaki lo conoce den 2015 danki na e ehecucion di e proyecto Green Corridor. “Nos ta hopi contento cu e prome accion di bario a cuminsa na Pos Chikito. Tin un interes grandi pa tur e ideanan cu Gobierno ta desaroyando rond,” asina Premier Eman a comenta. E bario aki, hunto cu otro bario pariba di brug ta bay haya un infrastructura mas adecua.

Prome Minister a gradici e bon bini caluroso cu el a haya den e bario for di famia Winterdal. Ta trata di un famia masha conoci y bon amigo cu a sirbi como guia durante e recorido cu a haci e mainta aki. Durante e trayecto y bishitando varios bisiña, a combersa riba e diferente necesidadnan den e bario, por ehempel caminda di santo pa asfalta y instalacion di iluminacion publico. E situacion aki ta similar na esun di otro barionan rond di Aruba, algo cu Gabinete Mike Eman I a alivia enormemente cu instalacion di luznan publico LED y drechamento di caya den varios bario. Tur esaki ta trabounan cu ta bay continua durante e proximo añanan.

E participacion di e ciudadano ta clave den e trabounan cu Gobierno tin planea pa mehora e calidad di producto Aruba y e nivel di bida di su hendenan. Un ehempel di esaki ta Sr. Eddy Winterdal, segun Prome Minister Eman a splica. “E mes a improvisa un verkeersdrempel na un di e camindanan banda di cas. Tur esaki ciudadano hopi activo y cu tin hopi interes no solamente pa nan mes, pero nan bisiña y esey ta loke Gobierno kier promove.” Pa e mandtario, personahenan asina ta importante den bario pasobra ta keda vocifera e necesidad di e bario y ta duna aporte unda por trece cambio.

Di su banda, Prome Minister Mike Eman ta sigui realisa e actividadnan manera Accion di Bario y Pinta Bo Bario pa duna su mes como ehempel y estimulo na otronan. Durante Accion di Bario, manera esun na Pos Chikito, e mandatario ta compaña pa representante di instancianan publico pa duna asistencia inmediato. Personal di Serlimar ta yuda si tin sushi grandi of auto pa bay cune. “Tin biaha ta hendenan cu tin cierto dificultad fisico cu nos por yuda nan y tur esey ta wordo haci den e mesun siman cu ta bishita e bario. Tur siman ta bay otro bario y asina ta duna cada bario e atencion cu nan merece,” asina Premier Eman a splica.

Otro instancianan cu ta forma parti di e actividad regularmente ta Bus di Salud, Gele Koorts Muskietbestrijding y trahadonan social. Den cierto caso ta realisa mediacion pa yega na trabou pa medio di e inventario cu tin di cuponan di trabou den sector priva.

Algo cu tambe Prome Minister Mike Eman a disfruta enormemente, tabata e oportunidad cu e ta haya di cana cu hobennan studiante durante e accion di bario. Sea aki na Aruba of na exterior, ta importante pa conscientisa e hubentud riba nan responsabilidad civico. “Den nan desaroyo academico ta wak teoria y practica. Nos por studia, pero nos mester aplik’e na cierto momento. Ta importante pa nos studiantenan participa y wak con nan estudio por wordo utilisa mañan pa un crea un miho calidad di bida,” tabata e palabranan di Minister President Eman na final di su recorido den e bario di Pos Chikito. Proximo actividad comunitario ta un di Pinta BoBario den districto di Oranjestad, mientras cu semanalmente ta haci e Accion di Bario rond di Aruba.

Expresionnan haci den e articulo aki no necesariamente ta refleha opinion di ArenaPoliti.co