SAVANETA -- Den fin di siman e candidatonan di MEP a campaña den Savaneta. Bishitando e casnan habitantenan ta haya un oportunidad pa expresa nan preocupacionnan y tambe kiko ta nan deseonan. 

"Locual cu mi a ripara ta cu hopi hende tin problema cu cobransanan halto di belasting. Especialmente nos pensionadonan. Cu duele mi ta wak nan preocupacion ora nan mustrami nan cobransanan halto, y sin cu nan por caba di paga nan. 

Tur esakinan ta debi cu gobierno di Mike Eman ainda no kier elimina e belasting riba pensioen di biehes. Apesar cu Mike Eman ta hasi manera cu esaki no ta un problema y cu el'a solucion'e caba, bo ta mira cu nada a wordo soluciona. Es mas, ta mas cobransa nos grandinan ta hayando cu sumanan hopi mas halto. Nan tin di paga miles na inkomstenbelasting y na AZV. Y esaki ta inhusto. 

Mi compromiso ta pa elimina e belasting riba pensioen di biehes. E ley ta traha caba, ta djis mester warda gobierno cambia, pa nos bin cu e cambio aki imediatamente.

Ta duel mi cu gobierno no kier a bin cu e cambio aki, pasobra e no ta algo pa MEP, e ta algo pa nos pensionadonan, y tur nos pensionadonan merese mihor. Pesey mi ta invita Mike Eman pa bai cana den e bario di Savaneta pa e scucha cuanto dolor esaki ta causando.

Nos tin un vision den cual nos ta pone e ser humano central. Nos lo cambia nos sistema di belasting y hasi'e mas husto. Nos pensionadonan merese un mihor cuido y nan merese un alivio di e peso di belasting, y MEP den gobierno lo percura pa esaki imediatamente", lider di MEP Evelyn Wever-Croes a duna di conose.