Parlamentario a haya 3 ora so pa studi’e 

ORANJESTAD – Parlamento a cuminsa trata e problemanan cu hedging a causa cu no por baha prijs di coriente na Aruba.

“Nos a ricibi e rapport awe mainta, y ya awe merdia nos mester a hasi pregunta. E reunion cu WEB y Utitlities en bes di acalrea e asunto, a laga nos cu mucho mas duda.

Presidente di Parlamento tambe a causa mas desconfiansa pa e forma dictatorial cu cual kier a stroba nos di hasi pregunta. Ayera, den un reunion tipo ‘bijeenkomst’ similar tocante cuido di riñon, nos por a hasi cuanto pregunta cu nos kier, pero awe, cu ta trata un topico hopi mas serio, nos a wordo limita pa 3 minuut. E presidente no por a duna ningun hustificacion dicon no a ni pone e proposicion di MEP pa 5 of 10 minuut, na votacion. Su mes a tuma e decision, y asina a impedi cu e berdadnan ta bin riba mesa.

Minister a ricibi e rapport dia 13 di februari, y dia 10 di maart a dicidi di mand’e pa Parlamento, pasobra Parlamento ta reuni dianan 11 y 12 di maart. Esaki ta un falta di respet y falta di etica di parti di e minister, pero mas aun, un prueba mas cu e presidente di parlamento Marisol Lopez-Tromp no conose su trabou. Ta parse cu tur energia ta dirigi den sconde cos, siendo cu tarea di Parlamento ta pa controla cos, no sconde cos. Gobierno a tuma mas di 3 siman pa studia e documento y Parlamentarionan ta haya 24 ora pa prepara! After all, ta trata di un tema sumamente delicado, cu ta di importancia grandi pa henter nos pais. Parlamentarionan mester haya e oportunidad pa cumpli cu nan tareanan constitucional.

E rapport di PWC ta hopi cauteloso pero e no ta completo. E ta cuminsa cu bisa cu nan a cambia e rapport despues di a papia cu algun persona, sin splica ta cual puntonan mester a wordo cambia, ni dicon. Otro punto remarcable ta cu PWC ta exigi “vrijwaring” pa cualquier consequencia financiero cu e rapport por tin.

Nan no a investiga mes e rol di Raad van Commissarissen ni Minister. E rapport traha door di PWC ta cuminsa cu defini kiko e tarea di PWC tabata: hasi un ‘feiten onderzoek’ con cos a bai den WEB so, y no investiga e rol di e raad van commissarissen, ni di minister. Tambe PWC mester a limita su mes na documentonan cu WEB dun’e so, y reunionnan teni. Pues PWC no tabata liber pa busca su propio informacion. Mas alew PWC ta skibi cu nan no por a verifica si e informacion financiero cu nan a haya ta corecto of no. Y PWC varios biaha ta skibi cu nan ta reserva nan derecho, pasobra nan no tabata tin tur libertad di investiga tur cos, sino mas bien mester a actua bou instruccion constante di e Hunta di Directiva. Esaki no ta locual cu e minister a priminti nos, pasobra asina Parlamento no por haya e bista completo di kiko tur a pasa. Pa nos esey ta un aspecto importante.

WEB a stop di hedge na 2009. E tempo ey nan tabata hedge na forma responsabel, pa periodo di maximo 3 luna y pa maximo 25%. Pero na 2012, segun e rapport, riba peticion di GOBIERNO DI AVP y cu aprobacion di DIALOGO SOCIAL a dicidi di cuminsa hedge atrobe y WEB a hasi total 20 contract di hedge. Pa cada contract mester tin aprobacionnan di hunta di directiva prome cu firma, debi cu ta trata di sumanan di riba 200 mil florin. Y pasobra GOBIERNO a pidi nan pa hedge pa periodo mas largo, nan a bai hedge pa 2 anja. Irespecto cu ta perdida tras di perdida nan tin. Awor WEB ta core cu un perdida di 7 miyon florin pa luna debi na e mal decisionnan di hedging. Hedge ta algo cu no ta ni necesario serca un compania di Utilidad. Hecho ta cu algo a bai bon malo akinan, pero e rapport no ta indica ken mester carga e responsabilidad final, debi cu no a investiga tur esnan envolvi. En todo caso, Gobierno mester informa Parlamento ta na cual momento el’a wordo informa di e consequencianan negativo di e erornan aki.

E punto mas importante pa nos di MEP ta con nos ta ta evita cu e erornan aki sigi wordo hasi, y pa esaki PWC ta duna algun recomendacion. No ta sigur si nan lo wordo sigi si of no. Pero mas importante ta pa anula e contractnan, pa asina brinda pueblo alivio y baha costo di coriente. Esey nos a splica minister tambe 6 siman pasa. Pero Utilities a informa nos cu nan no a pensa riba esey mes ainda! Nos a haya hopi informacion y di e investigacion - apesar cu e no ta completo – y tur cos ta mustra cu esunn cu a comete eror ta Minister Mike Eman”, lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co