24 maart 2015
Diamars atardi Parlamento a aproba e presupuesto 2015 di Parlamento den reunion Publico. Un suma di alrededor di 13.3 miyon florin. Durante e reunion Parlamentario Mervin Wyatt-Ras, den un punto di ordo, a cuestiona cu lider di fraccion di MEP cu ta suppose di a participa den e comision cu a traha riba e presupuesto no tey presente. Despues ela cana yega laat, sin notifica y a haci pregunta mescos cu e no ta parti di e comision. Manera su estilo ta di laba man ela haci preguntanan cu por a trese padilanti den e comision. No ta usual tampoco cu un miembro di parlamento cu tin cu prepara e presupuesto ta haci preguntanan den OV sin cu ela ni participa den e comision preparatorio. Esaki ta refleha e falta di profesionalismo di e parlamentario aki.

Ariba e pregunta di parlamentario Wyatt-Ras na Presidente tocante dicho participacion por a constata cu na 2014 Evelyn no a presenta na niun di e 30 reunionnan di e comision di Asuntonan Domestico y e anja aki tampoco, mientras 3 reunion ela laga un otro miembro, sr. Besaril, represente, kende awe no a presenta na reunion. Por nota claramente cu entre nan tin un problema. Evelyn a bin ta bisa cu e ta preocupa pa loke ta pasa den Staten, ta preocupa pa e presupuesto y desaroyo, mientras su accionnan ta mustra diferente.

Segun Wyatt-Ras Evelyn envez di guia su “zogenaamde” preocupacion na participacion y discucion cu miembronan di e comision e ta keda cas, biba “lekker” of haci su cosnan personal, envez di bin trabou y sali na vanguardia di nos pueblo. Pero ora di reunion cu tin camera e ta haci un show di preocupacion y yoramento di 30 minuut.

Wyatt-Ras a extende palabra di elogio pa e comision cu a traha riba e presupuesto, consistiendo di sra. Lopez-Tromp, sr. Herde y sr. Bikker y tambe na e acesoria cu a prepara e parti di vision y e parti financiero di e presupuesto. Tambe ela gradici personal di Parlamento pa e bon trabou cu ta haci durante oranan largo di reunion, preparacion di reunionnan y trabou cu tin den Parlamento.

Ela trese padilanti cu tin diferente proyectonan menciona den e presupuesto cu e mes como Parlamentario ta forma parti di dje manera e trabounan pa yega na cambio di e reglamento di orden, independisacion di parlamento y e ley di Ombudsman. Tur esakinan ta ensera tempo y esfuerzo di parti di e diferente miembronan di parlamento y e trahadornan cu tin cu prepara e contenido y reunionnan. Di esaki tampoco e lider di MEP ta forma parti. Wyatt-Ras ta contento cu continuacion di digitalisacion di Staten, cu nos por tin nos parlamento.tv y nos web-site, tur como parti di vision y esfuerzo di varios anja atras. E hecho cu a nombra un hoofd-bedrijfsvoering Wyatt-Ras ta expresa como positivo, locual tabata algo cu cada biaha e tabata boga pe. Wyatt-Ras a haya hopi stranjo cu lider di MEP manera “yo no fui”. Por a nota claramente cu ora Wyatt-Ras tabata hiba su discurso cu esnan di MEP tabata grita na e otro banda, perdiendo respet pa su persona y pa Presidente di Parlamento cu a guia reunion. Manera Wyatt-Ras a comenta berdad ta haci dolor y ta pesey e miembronan di MEP ta grita.

Wyatt-Ras a comenta alavez ariba e respet cu no tin den Parlamento. Cu ta tira palabra pa otro, yama otro pa tur sorto di nomber y cu nos como Parlamento mester duna ehempel. Ademas e forma con lider di MEp ta bisa cu e tin otro cos di haci pesey e no ta bin reunion. E parlamentario ta kere cu mester introduci un Codigo di Comportacion y Etica na cual tur mester atene su mes. Mescos cu tur hende na Aruba mester traha pa cobra fin di luna esaki mester ta aplicabel tambe pa Evelyn.

Manera cu Presidente di Parlamento a splica den e Presupueso di 2014 a corta casi 1 miyon florin den e presupuesto anterior y pesey ta parse como e suma di prespuesto a crece. Sigur Wyatt-Ras ta haya cu nos mester keda critico y sigui eleva nivel di Parlamento. Wyatt-Ras den nomber di fraccion a duna sosten na e presupuesto hunto cu su coleganan. Ariba e pregunta kico Presidente lo haci cu e hecho cu lider di fraccion di MEP no ta bin reunion a keda visto cu no por spera nada di e Parlamentario aki cu manera e ta bin ta haci caba, lokeda biba lekker y keha pa busca atencion. Wyatt-Ras ta spera cu e otro miembronan di e fraccion no tuma e mal ehempel aki, pasobra con cu bai bin ta placa di nos pueblo ta paga pa e Parlamentario aki cu den cara di tur hende ta bisa cu e no lo presenta na reunion paso e tin otro cos di haci. 

Expresionnan haci den e articulo aki no necesariamente ta refleha opinion di ArenaPoliti.co