Xiomara Maduro: Gabinete Eman ta tuma Parlamento haci cu Presupuesto 2015
Despues di un retraso di mas di 6 luna Parlamento a recibi e Presupuesto 2015 di Pais Aruba. Awor parlamentarionan ta studiando esaki y ta bay manda preguntanan pa Gobierno por contesta promer cu e debate publico tuma lugar. Pero e presupuesto cu e Parlamentarionan a haya nan dilanti no ta completo, ya cu awor ta sali na cla cu Gabinete Eman tin un Nota di Cambio caba traha pa por haci cambio na e Presupuesto 2015. Parlamento te ainda no sa cual ta e cambionan aki.
Remarcabel ta cu Gabinete Eman no a manda e cambionan aki pa Parlamento por ta na altura di nan promer cu a traha pregunta pa Gobierno. Ta for di e carta di Raad van Advies di 2 di april 2015 dirgi na Parlamento di Aruba, Parlamentarionan a haya sa di e Nota di Cambio aki. E pregunta cu ta surgi ta, si Gobierno sa caba cu e ta bay haci cambio, pakiko e no a duna Parlamento e cambionan aki? Pakiko ela entrega un presupuesto na Parlamento cu no ta completo? Ta ki cambionan Gabinete Eman tin den mente caba cu Pueblo no por haya sa di nan awor aki caba?
Normalmente un Nota di Cambio ta wordo entrega na Parlamento durante e debate publico y Raad no mester duna un conseho riba dje. Solamente ora cu e cambionan cu Gobierno kier haci ta hopi grandi, Gobierno ta pidi Raad pa duna su conseho riba dje promer cu e presenta esaki na Parlamento. Dus awor cu Raad a haya e Nota di Cambio esaki ta indicacion cu Gabinete Eman lo bay haci cambionan grandi na e Presupuesto 2015. E pregunta ta, dicon no a informa Parlamento riba e cambionan aki? Door di keda keto riba e cambionan aki y purba na sconde informacion pa Pueblo, Gabinete Eman ta tuma Parlamento haci cu Presupuesto 2015.
14 april 2015
Expresionnan haci den e articulo aki no necesariamente ta refleha opinion di ArenaPoliti.co