Red Democratico ta apoya intervencion di Hulanda na Aruba
![RED01](/images/400x210/RED01.jpg)
Recientemente, dia 30 di januari 2015, Conseho di Minister di Reino a impone riba St. Maarten un Algemene Maatregel van Rijksbestuur. For di basta tempo a keda scondi den lachi e rapport di WODC tocante e falta di integridad y corupcion na nivel gubernamental riba e isla. Mas rapport a keda traha cu ta mustra riba e mesun problema, pero nan ta keda den rapport, e gobernantenan di e isla no ta ehecuta e recomendacionnan. Hulanda cu razon awor a impone riba St. Maarten cu bao di supervision di Hulanda ta bai ejecuta e recomendaccionnan.
Ta mesun caso cu esun di Aruba. For di Rapport di Comision di Berdad, despues Rapport di WODC y finalmente e rapport di Cft, ningun gobierno a ehecuta e recomendacionnan di e diferente rapportnan menciona. Atrobe Cft a menciona cu e presupuesto 2015 no ta cuadra cu exigencianan di bon gobernacion. A pesar cu tin awor un vakminister di financien cos no a cambia na Aruba. SI NO BIN UN INTERVENCION EXTERNO, ARUBA LO SINK FINANCIERAMENTE.
Pesei pa nos no ta keda otro cu Hulanda impone un Algemene Maatregel van Rijksbestuur y pone Aruba bao di curatela financiero di Cft. Mas ainda, independiente di e situacion financiero di Aruba, control externo semper ta bon. Unda tin placa y tin ser humano, mester tin control. Y loke ta faya na Aruba ta falta di control. Nos parlamento no ta controla gobierno y ta un stempelparlement. Pesei nos ta apoya supervision financiero di Hulanda via Cft di un forma permanente pa cualke gobierno cu sinta. Pasinan poderoso manera Alemania y Francia, y tambe Hulanda mes, a acepta control financiero di Bruselas esta di Union Europeo. Bon bini anto na control externo pa tin bon gobernacion na Aruba.
Expresionnan haci den e articulo aki no necesariamente ta refleha opinion di ArenaPoliti.co